සටහන: සශිකලා මධුෂාණි
අගෝස්තු මස 18: ලෝකය(අවුට්බවුන්ඩ් ටුඩේ): දකුණු කොරියාවේ වාර්තා වූ අසාමාන්‍ය ලෙස ඉහළයන වර්ෂාපතනය හේතුවෙන් අවම වශයෙන් එක් පුද්ගලයෙකු මියගොස් තවත් සිව්දෙනෙකු තුවාල ලබා තිබේ.
විශේෂයෙන්ම Geoje නගරයට සෙනසුරාදා සිට සඳුදා(15-17) උදෑසන දක්වා මිලිමීටර් 805.7ක පමණ වර්ෂාපතනයක් ලැබී තිබේ. අධික වර්ෂාව නිසා පුද්ගලයන් 390කට ආසන්න පිරිසක් ආරක්ෂිත ස්ථාන වෙත ඉවත් කර ඇති අතර, නිවාස 3,580කට පමණ විදුලිය ඇණහිට තිබේ. පාසල් සහ ළදරු පාසල් කිහිපයකටද ජලයෙන් හානි සිදුව ඇත.
මේ අතර පිලිපීනයේ මැනිලා අගනුවර සහ අවට ප්‍රදේශවලද මෝසම් වැසි හේතුවෙන් දැඩි ගංවතුරක් හටගෙන තිබේ. ප්‍රධාන මාර්ග ජලයෙන් යටවීමත් සමඟ රථවාහන ගමනාගමනය දැඩි ලෙස අඩාල වී ඇති අතර, රජයේ කාර්යයන් අත්හිටුවීමටත් පාසල්වල පන්ති මාර්ගගතව පැවැත්වීමටත් බලධාරීන් කටයුතු කර තිබේ.
පසුගිය සති තුනක පමණ කාලය තුළ ඇති වූ මෝසම් වැසි සහ කුණාටු හේතුවෙන් පිලිපීනයේ මිලියන 5කට පමණ ජනතාවක් බලපෑමට ලක්ව ඇති අතර අවම වශයෙන් 23 දෙනෙකු මියගොස් තිබේ.
