රෂිකා හෙන්නායක අගෝස්තු 19, කොළඹ LNW :
මෙම නව ව්‍යාපෘතිය නේවාසික මහල් 13ක්, නිවාස 78ක් සහ වාහන නැවැත්වීමේ මහල් හයක් සැලසුම් කර ඇත
යාපනය නගරයේ උසම නවාසික ගොඩනැගිල්ල ඉදිකිරීම සඳහා Tilko Blue Ocean Holdings සමාගම, ශ්‍රී ලංකා ආයෝජන මණ්ඩලය (BOI) සමඟ ගිවිසුමකට අත්සන් තබා ඇත. නිවාස ඒකක 78 කින් සමන්විත මෙම ව්‍යාපෘතිය ‘Yarl Royal Palace’ ලෙස නම් කර තිබේ.
ඓතිහාසික ඕල්ඩ් පාර්ක් (Old Park) පරිශ්‍රයට මුහුණලා, අංක 107, මහනුවර පාර යන ස්ථානයේ පිහිටි මෙම ව්‍යාපෘතිය, උතුරු ශ්‍රී ලංකාවේ උසම නවාසික සලකුණ බවට පත්වනු ඇතැයි ආයෝජන මණ්ඩලය පවසයි. එමෙන්ම එය එම කලාපයේ උසස් නේවාසික ගොඩනැගිලි සංවර්ධනය සඳහා නව මිනුම්දණ්ඩක් පිහිටුවනු ඇත.
මෙම ගොඩනැගිල්ල වාහන නැවැත්වීමේ මහල් 6කින්, නේවාසික මහල් 13කින් සහ නිවාස ඒකක 78කින් සමන්විත වේ. කෙසේ වෙතත්, මෙහි ආයෝජන වටිනාකම, ඉදිකිරීම් කාලරාමුව හෝ වැඩ අවසන් කිරීමට බලාපොරොත්තු වන දිනය පිළිබඳව ආයෝජන මණ්ඩල ප්‍රකාශයේ සඳහන් කර නොමැත.
යාපනය සහ සමස්ත උතුරු පළාත තුළ සිදු කෙරෙන පෞද්ගලික අංශයේ ප්‍රධාන ආයෝජනයක් ලෙස ‘Yarl Royal Palace’ ව්‍යාපෘතිය හඳුන්වා දෙන ආයෝජන මණ්ඩලය, ඉදිකිරීම්, ඉංජිනේරු, වෘත්තීය උපදේශන, ගොඩනැගිලි ද්‍රව්‍ය, ප්‍රවාහන (logistics), මූල්‍ය සේවා සහ දේපළ කළමනාකරණය යන ක්ෂේත්‍ර රැසක ආර්ථික ප්‍රබෝධයක් මෙයින් අපේක්ෂා කරයි.
එක්සත් රාජධානිය, කැනඩාව, ඕස්ට්‍රේලියාව, ප්‍රංශය, ස්විට්සර්ලන්තය සහ ජර්මනිය ඇතුළු රටවල වෙසෙන ගෝලීය දෙමළ ඩයස්පෝරාව සමඟ යාපනයට ඇති සබඳතා උපයෝගී කරගනිමින්, විදේශගත පවුල්, වෘත්තිකයන් සහ ආයෝජකයින්ට යාපනයේ දේපළ වෙළඳපොළට දායක වීමට අවස්ථාව සැලසීම ද මෙම ව්‍යාපෘතියේ අරමුණකි.
ආයෝජන මණ්ඩලයට අනුව, යාපනයේ ව්‍යවසායක ප්‍රජාව, වෘත්තීය හා අධ්‍යාපනික පදනම, දියුණු වන යටිතල පහසුකම්, නාගරික ඉඩම් සහ ඩයස්පෝරාව සමඟ ඇති සබඳතා ඉදිරි පෞද්ගලික ආයෝජන සඳහා හොඳ පදනමක් සපයයි.
ශ්‍රී ලංකාවේ සාම්ප්‍රදායික දේපළ වෙළඳපොළෙන් ඔබ්බට ගොස්, යාපනය තුළ මෙවැනි විශාල මට්ටමේ සංවර්ධන ව්‍යාපෘතියක් ආරම්භ වීම මඟින් මහා පරිමාණ පෞද්ගලික ආයෝජන සඳහා ඇති හැකියාව පෙන්නුම් කරන බව ද BOI සඳහන් කරයි.
ශ්‍රී ලංකාවේ උතුරු ආර්ථික හැකියාව පිළිබඳ තමන් තුළ ඇති දීර්ඝකාලීන විශ්වාසය සහ එම කලාපයේ ඉදිරියටත් ආයෝජනය කිරීමට ඇති කැපවීම මෙම ව්‍යාපෘතියෙන් පිළිඹිබු වන බව Tilko Blue Ocean Holdings සමාගම පවසයි.
ජනාධිපති ජ්‍යෙෂ්ඨ ආර්ථික උපදේශක සහ BOI සභාපති දුමින්ද හුලංගමුව මහතා (දකුණ) Tilko Blue Ocean Holdings කළමනාකාරීත්වය සමඟ
