සටහන – නදීක දයා බණ්ඩාර
අගෝස්තු 20,LNW මහනුවර :සෙංකඩගල ඓතිහාසික ඇසළ පෙරහැර මංගල්‍යයේ අවසන් රන්දෝලි පෙරහැර ඊයේ (19) රාත්‍රී වීදි සංචාරයට එක්විය.
රාත්‍රී 06.57ට උතුරු දිශාභිමුඛව නාථ, විෂ්ණු, කතරගම සහ පත්තිනි යන සිව් මහා දේවලා පෙරහැර සමඟින් ශ්‍රී දළදා මාලිගාවේ පෙරහැර වීදි සංචාරයට එක්විය.
එය මහනුවර දළදා වීදිය, යටිනුවර වීදිය, කන්දේ වීදිය, ඩී.එස්.සේනානායක වීදිය ඔස්සේ ගමන් කොට රජ වීදියෙන් යළි ශ්‍රී දළදා මාලිගාව වෙත ගෙවැදිණි.
ශ්‍රී දළදා මාලිගායේ ඇත් පන්තියට අයත් ඉන්දිරාජා ඇතු විසින් සධාතුක කරඩුව වැඩම කරවන ලද අතර දෑලේ ගමන් ගන්නා ලද්දේ කෝට්ටේ රජමහ විහාරයේ කෝට්ටේ රාජා ඇතු සහ ශ්‍රී දළදා මාලිගාවේ මියන්රාජා ඇතුන්ය.
ශ්‍රී දළදා මාලිගාවේ දියවඩන නිලමේ ප්‍රදීප් නිලංග දෑල මහතා පෙරහැර ගමනට එක්විය.
සිව් මහා දේවාලයන් හී බස්නායක නිලමේවරුන් ද පෙරහැර ගමනට එක්වූහ.
පෙරහැර ආරම්භයේදී වැසි ඇද හැලුණත් එය නොතකා සැදැහැවතුව් පෙරහැර නැරඹීමට සහභාගීව සිටියෝය.
ජනධිපති රනිල් වික්‍රමසිංහ මහතා, ප්‍රවාහන මහා මාර්ග හා ජනමාධ්‍ය අමාත්‍ය බන්දුල ගුණවර්ධන මහතා, ආයෝජන ප්‍රවර්ධන රාජ්‍ය අමාත්‍ය දිලුම් අමුණුගම මහතා ඇතුලු පිරිසක් ද පෙරහැර නැරඹීමට එක්විය.
