සටහන: සශිකලා මධුෂාණි,
අගෝස්තු 22, ලෝකය (අවුට්බවුන්ඩ් ටුඩේ) : එක්සත් රාජධානියේ සංක්‍රමණ විරෝධී කෝලහාල ඇවිලවීම සම්බන්ධයෙන් 31 හැවිරිදි මෘදුකාංග ඉංජිනේරුවෙක් වන ෆර්හාන් අසීෆ් නම් පකිස්තානු ජාතිකයකුට එරෙහිව ත්‍රස්තවාදී චෝදනා ගොනුකර ඇති බව වාර්තා වේ.
පසුගියදා එක්සත් රාජධානියේ සවුත්පෝට්හි ගැහැණු ළමයින් තිදෙනෙකු මරා දැමූ මාරාන්තික පිහි ප්‍රහාරයක් සම්බන්ධයෙන් මුස්ලිම් සරණාගතයෙකු සැක කරන බවට අදාළ අසත්‍ය ලිපියක් ෆර්හාන් අසීෆ් විසින් පවත්වාගෙන යනු ලබන Channel3Now වෙබ් අඩවියේ පළ කිරීම සම්බන්ධයෙන් ඔහුට මෙලෙස චෝදනා එල්ල කර තිබේ.
මෙම චෝදනාවන් සම්බන්ධයෙන් පාකිස්තානයේ ෆෙඩරල් විමර්ශන ඒජන්සියේ ජ්‍යෙෂ්ඨ නිලධාරියෙක් ජාත්‍යන්තර මාධ්‍ය වෙත සඳහන් කර තිබුණේ, මුල් පරීක්ෂණවලින් පෙනී යන්නේ ඔහුගේ එකම අභිප්‍රාය වූයේ clickbait අන්තර්ගතය හරහා මුදල් ඉපයීම පමණක් වන බවයි.
