ආශිකා බ්‍රාහ්මණ
කොළඹ LNW:බන්ධනාගාර තුළ හදිසි තත්වයක් ඇති වුවහොත් ප්‍රාදේශියව සම්බන්ධිකරණයක් පවත්වා ගනිමින් රාජ්‍ය ආයතන අතර ඒකාබද්ධ යාන්ත්‍රණයක් ස්ථාපිත කිරීමේ වැඩපිළිවෙල තුළින් රැඳවියන්ගේ සුභසාධක කටයතු විධිමත් කිරීමේ වැඩපිළිවෙල යටතේ ඒකාබද්ධ යාන්ත්‍රණයක් පිහිටුවීම අනුරාධපුර බන්ධනාගාරයේ ද පිහිටුවා තිබේ.
අධිකරණ සහ ජාතික ඒකාබද්ධතා අමාත්‍ය, නීතිඥ හර්ෂණ නානායක්කාර මහතාගේ ප්‍රධානත්වයෙන් අනුරාධපුර බන්ධනාගාරයේදී ඊයේ ( 26) පස්වරුවේ එම සාකච්ජාව පවත්වා ඇත.
හදිසි අවස්ථාවකදී ප්‍රතිචාර දැක්වීමට සහ රැඳවියන්ගේ සුභ සාධනය මුලික අරමුණ කර ගනිමින් රාජ්‍ය ආයතන සම්බන්ධ කර ගනිමින් ඒකාබද්ධ යාන්ත්‍රණයක් දිවයිනේ සෑම බන්ධනාගාරයක් තුළම ස්ථාපිත කිරීමට කටයුතු කරනු ලබන අතර, ඒකාබද්ධ යාන්ත්‍රණය පිහිටුවීමේ අරමුණ සම්බන්ධයෙන් අධිකරණ අමාත්‍යතුමා විසින් රාජ්‍ය නිලධාරීන් දැනුවත් කරන ලදී.
ඒකාබද්ධ යාන්ත්‍රණය පිහිටුවීම සම්බන්ධයෙන් සාකච්ඡා කිරීමෙන් අනතුරුව අධිකරණ අමාත්‍යවරයා අනුරාධපුර බන්ධනාගාරයේ රැඳවියන්ගේ අවශ්‍යතා සොයා බැලීමේ නිරීක්ෂණයක නිරත වූ අතර කාන්තා අංශය, මුළුතැන්ගෙය සහ රිමාන්ඩ් සැකකරුවන් රඳවා ඇති ස්ථාන අමාත්‍යවරයාගේ නිරීක්ෂණයට ලක්ව ඇති අතර එළිමහන් සිරකඳවුරේ රැඳවියන් ආමන්ත්‍රණය කිරීම ද සිදු විය.
අනුරාධපුර අතිරේක දිස්ත්‍රික් ලේකම් සන්ධ්‍යා අබේසේකර, අනුරාධපුර සහකාර ප්‍රාදේශීය ලේකම් එස්.යූ. සුභසිංහ, බන්ධනාගාර අධිකාරී ප්‍රසාද් ප්‍රේමතිලක, අනුරාධපුර ප්‍රදේශය භාර ජ්‍යේෂ්ඨ නියෝජ්‍ය පොලිස්පති පී.සී.ඒ. ධනපාල යන මහත්ම මහත්මීන් ඇතුළු ජල සම්පාදන මණ්ඩලය, බන්ධනාගාර දෙපාර්තමේන්තුව, ශ්‍රී ලංකා නාවික හමුදාව, යුද හමුදාව, පොලීසිය, සෞඛ්‍ය වෛද්‍ය නිලධාරී කාර්යාලය ඇතුළු රාජ්‍ය ආයතන නියෝජනය කරමින් උසස් නිලධාරීන් මෙම අවස්ථාවට එක්ව සිටියහ.
