සටහන : සශිකලා මධුෂාණී
ලෝකය(අවුට්බවුන්ඩ් ටුඩේ) අගෝස්තු 28දින : නේපාලය සහ ටිබෙට් දේශසීමා ප්‍රදේශයට බලපෑ දැඩි ගංවතුර තත්ත්වයෙන් පසු, තවත් ජල ගැලීමක් ඇතිවිය හැකි බවට ඇති අවදානම හේතුවෙන් සහන හා ගලවාගැනීමේ කණ්ඩායම් දැඩි අවධානයෙන් පසුවෙති.
මේ වන විට මරණ සංඛ්‍යාව 390කට ආසන්න වී ඇති අතර, 1,400කට වැඩි පිරිසක් අතුරුදන්ව සිටින බව වාර්තා වේ.
අධික වර්ෂාව සහ කඳුකර ප්‍රදේශවල ඇති වූ හදිසි ජල ප්‍රවාහ හේතුවෙන් මාර්ග, පාලම් සහ ගොඩනැගිලි ඇතුළු යටිතල පහසුකම් රැසකට හානි සිදුව තිබේ. මේ හේතුවෙන් විපතට පත්වූ ප්‍රදේශ වෙත ළඟාවීම ගලවාගැනීමේ කණ්ඩායම් සඳහා දැඩි අභියෝගයක් වී ඇත.
අතුරුදන් වූ පුද්ගලයන් සොයා ගලවාගැනීමේ මෙහෙයුම් අඛණ්ඩව ක්‍රියාත්මක වන අතර, හෙලිකොප්ටර් සහ අනෙකුත් සහන කණ්ඩායම් ද මෙහෙයුම් සඳහා යොදාගෙන තිබේ.
මේ අතර, විපතට පත් ප්‍රදේශ ආසන්නයේ ජලය එක්රැස් වීම හේතුවෙන් තවත් ජල ප්‍රවාහයක් පහළ ප්‍රදේශ වෙත පැමිණිය හැකි බවට බලධාරීන් අවධානය යොමු කර ඇත. එම අවදානම හේතුවෙන් ගලවාගැනීමේ කණ්ඩායම්ද දැඩි අවධානයෙන් කටයුතු කරමින් සිටිති.
විපතට පත් ජනතාවට ආරක්ෂිත ස්ථාන ලබාදීම, අතුරුදන් වූවන් සෙවීම සහ අවශ්‍ය ආහාර හා වෛද්‍ය ආධාර ලබාදීම මේ වන විට ප්‍රධාන ප්‍රමුඛතාවයන් බවට පත්ව තිබේ.
