උද්ධමනය ඉහළ යාම සහ ඉන් පසුව ඇති වූ ජීවන වියදම මෙන්ම යුක්රේනයේ යුද්ධය හේතුවෙන් ඇති වූ ආහාර සහ බලශක්ති මිල ඉහළ යාමත්, කෝවිඩ් බලපෑම ආදී දුෂ්කරතාවයන් හේතුවෙන් දරුවන් පාසලෙන් ඉවත් කර රැකියාවලට ඇද දැමීම නිසා මිලියන සංඛ්‍යාත දරුවන්ගේ අනාගතය අවදානමට ලක්ව ඇති බව එක්සත් ජාතීන්ගේ කම්කරු සංවිධානයේ (ILO) අධ්‍යක්ෂ ජනරාල් Gilbert Houngbo පවසා තිබේ.
2020 මුල් භාගයේදී එක්සත් ජාතීන්ගේ සංවිධානය විසින් සම්පාදනය කරන ලද දත්ත වලට අනුව ළමුන් මිලියන 160 පමණ පිරිසක් ළමා ශ්‍රමිකයන් වශයෙන් හඳුනාගෙන ඇති අතර ඉන් බහුතරයක් ලිංගික වශයෙන් සුරාකෑමටද ලක්වන බව පැවසේ.
මේ සම්බන්ධයෙන් එක්සත් ජාතීන්ගේ ළමා අරමුදල (යුනිසෙෆ්) පවසන්නේ උද්ධමනය සහ ඉහළ යන ජීවන වියදම දරුවන්ට විවිධ ආකාරවලින් බලපාන බවයි.
යුනිසෙෆ් හි සමාජ ප්‍රතිපත්ති සහ සමාජ ආරක්ෂණ වැඩසටහනේ අධ්‍යක්ෂ නටාලියා වින්ඩර්-රොසි මේ සම්බන්ධයෙන් ප්‍රකාශ කර තිබුණේ, අඩු, මධ්‍යම සහ ඉහළ ආදායම් ලබන රටවල සහ කෘෂිකර්මය, පතල් කැණීම් සහ ඉදිකිරීම් ඇතුළු ක්ෂේත්‍රවල ළමා ශ්‍රමිකයන් වැඩි වශයෙන් යොදවා ඇති අතර බොහෝ පවුල් සෘණාත්මක උපාය මාර්ග වෙත යොමුව ඇති බවයි.
සශිකලා මධුෂාණි-outboundtoday
