සටහන – රෂිකා හෙන්නායක
කොළඹ (LNW): බදුල්ල දිස්ත්රික්කයේ පදිංචිව සිට විදෙස් ගත වූ 32 හැවිරිදි ශ්රී ලාංකික තරුණියක්, තම ජීවිතයට සිදු වූ විශාල අසාධාරණයක් නිසා මැදපෙරදිග ගෘහ සේවා ඉතිහාසයේ විශාලතම වන්දි මුදල වන රුපියල් හැට අට ලක්ෂයක් (ලක්ෂ 68) ගෙන ඇති බව වාර්තාවේ.
කුවේට් රාජ්යයේ (Sabah Al Salim City) ගෘහ සේවය සදහා 2022.10.22 දින ගොස් තිබුණේ එරට රාජ්ය සේවයේ නිරත සේවකයින් සිටින නිවෙසකටය.
එහිදී එම නිවසේ සිටින මෙම හාම්පුතාගේ 32 හැවිරිදි පුතා විසින් අවස්ථා කීපයක දී මෙම තරුණියට බලහත්කාරකම් සිදු කර ඇති අතර පසුව රෝගාතුරව සිටි මෙම තරුණිය ශ්රී ලංකාවට ආපසු එවීම සදහා කුවේට් රාජ්යයේ ගුවන් තොටුපොළ වෙත ගෙනැවිත් භාර දී ඇත්තේද එම අකටයුතුකම් සිදු කළ කුවේට් ජාතික තරුණයාගේ පියා විසින් බවද වාර්තාවේ.
ඒ අනුව කුවේට් ගුවන්තොටුපොළ නිලධාරීන් තරුණිය ගෙන් කරුණු විමසා මේ පිළිබඳව කුවේට් රාජ්යයේ ශ්රී ලංකා තානාපති කාර්යාලය දැනුවත් කිරීමට පියවර ගෙන තිබුණු අතර , ඒ අනුව වහාම ක්රියාත්මක වූ කුවේට් රාජ්යයේ ශ්රී ලංකා තානාපති කාන්දීපන් බාලසුබ්රමනියම් මහතාගේ උපදෙස් මත, නියෝජ්ය තානාපති අබ්දුල් හලීම් මහතාගේ අධීක්ෂණය යටතේ එම කාර්යාලයේ තෙවන ලේකම් ජනක සමරසේකර, භාෂා පරිවර්තක අමීර් හසන් සහ රවුෆ් යන මහත්වරුන් විසින් මෙම තරුණිය ජබරියා හි අල් මුබාරක් රෝහල වෙත ඇතුළත් කර ඇති බවයි වාර්තා වන්නේ.
ඉන්පසුව මෙම සිදුවීම අහමදි අධිකරණය වෙත රැගෙන ගිය මෙම ශ්රී ලාංකික නිලධාරීන්, එරට නීතිවේදීන් සමග මාස 06 ක පමණ කාළයක් දැඩිව ගැටෙමින්, මෙම තරුණිය වෙත කුවේට් ඩිනාර් 6,500 ක් වටිනා රුපියල් ලක්ෂ 68 ක වන්දි මුදල ලබා දීමට කටයුතු කර තිබුණි.
ඒ අනුව එම තරුණිය ඊයේ (03) දින ශ්රී ලංකාවට පැමිණ ඇති බවයි තොරතුරු වාර්තා වන්නේ.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
