තලංගම පැලවත්ත ප්‍රදේශයේ හෝටල් කාමරයක අබිරහස් අන්දමින් ඝාතනය කර සිටි මනෝ උපදේශිකාවකගේ සිරුර තලංගම පොලිසිය මගින් සොයා ගත්තේ පෙරේදා (4)වන දින උදෑසනයි.පොලිසිය සැකකරන්නේ ගෙල සිරකිරීමෙන් මෙම මනෝ උපදේශිකාව ඝාතනය කරන්නට ඇති බවයි.
ඝාතනයට ලක්වූ 53 හැවිරිදි සුජාතා මුණසිංහ මානාභරණ මහත්මියගේ ගෙල වටා නයිලෝන් ලණුවක් තිබී සහ ඇගේ ගෙල සිරකළ බවට සලකුණු රැසක් තිබෙන බව ද පොලිසියට අනාවරණය වී ඇත.සුජාතා මුණසිංහ මහත්මිය තවත් පුද්ගලයකු සමග දින 05 ක් තිස්සේ මෙම හෝටල් කාමරයේ නවාතැන්ගෙන සිට ඇත.
ඔවුන් එම කාලසීමාව තුළදී රාත්‍රි කාලයේ මෙම හෝටල් කාමරය වෙත පැමිණෙන බවද රැය පහන් වනතුරු එහි රැඳී සිටින බවද විමර්ශනවලින් හෙළිවී තිබේ.සිරුර සොයා ගත් දිනයේදී උදෑසන මෙම කාමරයේ දොර විවෘත නොකිරීම නිසා හෝටල් සේවකයන් එය විවෘත කර බැලීමේදී සුජාතා මුණසිංහ මහත්මිය මියගොස් සිටීම නිසා ඔවුන් තලංගම පොලිසිය වෙත දැනුම් දී තිබුණි.
පසු එහි පැමිණි පොලිස් නිලධාරීන් අපරාධ ස්ථාණිය පරික්ෂන නිළධාරීන් විමර්ශන ආරම්භ කර තොරතුරු රැසක් අනාවරණය කරගෙන ඇත.මෙම හෝටලයේ සීසීටීවී කැමරා සවිකර තිබුණ ද කාලයක සිට ඒවා අක්‍රියව පැවැති බව පොලිසිය පවසයි.සිද්ධිය සම්බන්ධයෙන් තලංගම පොලිසිය විමර්ශන පවත්වාගෙන යයි.
