පසුගියදා පැවති ජාතික ජන බලවේගයේ නීතීඥ සමුළුවේ ප්‍රධාන දේශකයකු වශයෙන් විශ්‍රාමික ශ්‍රේෂ්ඨාධිකරණ විනිසුරු රෝහිණී මාරසිංහ මහත්මිය සම්බන්ධ කරගැනීම ගැන පක්ෂය තුළින්ම දැඩි විරෝධයක් එල්ල වී ඇති බව වාර්තා වේ.
රෝහිණී මාරසිංහ යනු රෝයල් පාර්ක් ඝාතනය සම්බන්ධයෙන් වැරදිකරු වී මරණීය දණ්ඩනය නියම වී සිටි ජූඩ් ශ්‍රමන්ත ජයගහ නම් පුද්ගලයාව ජනාධිපති සමාව මත නිදහස් කරන ලෙස එවකට ජනාධිපති මෛත්‍රීපාල සිරිසේන මහතාගෙන් ඉල්ලීම් කළ ප්‍රධාන චරිතයකි. ජනාධිපති සමාව ලබා නිදහස ලද සැණින් අදාළ පුද්ගලයා රටින් පළාගිය අතර මෛත්‍රීපාල සිරිසේන ජනාධිපතිවරයා ඔහුට ජනාධිපති සමාව ලබාදීම සිදුකර ඇති ආකාරය නීතිවිරෝධී බව පසුව ශ්‍රේෂ්ඨාධිකරණය විසින් තීරණය කර තිබිණි. ඒ අනුව ඔහුව අත් අඩංගුවට ගන්නා ලෙස ශ්‍රේෂ්ඨාධිකරණය නියෝග කළත් ඔහු ආගිය අතක් සොයා ගැනීමට නොහැකි වී තිබේ. මෛත්‍රීපාල සිරිසේන මහතා සිය ධුර කාලයෙහි අවසන් දින කිහිපයේදී මෙසේ කෝටිපති ව්‍යාපාරිකයකුගේ පුත්‍රයකු වන විත්තිකරුට මෙම ජනාධිපති සමාව ලබාදීමේ සිද්ධිය සමාජය තුළ තවමත් දැඩි විවේචනයට ලක්වන්නකි. ඒ අනුව රෝහිණී මාරසිංහත් එම දූෂිත ක්‍රියාදාමයේ ප්‍රබල පුරුකකි.
එසේම හිටපු ජනාධිපති මහින්ද රාජපක්ෂ මහතා එවකට අභියාචනාධිකරණයේ සභාපතිවරයාව සිටි විනිසුරුවරයා මඟහරිමින් ඊට පහළින් සිටි රෝහිණී මාරසිංහ මහත්මියව ශ්‍රේෂ්ඨාධිකරණ විනිසුරුවරියක වශයෙන් පත්කිරීම පිළිබඳව ද නීති ක්ෂේත්‍රය තුළ ඒ සමයේ දැඩි විවේචනයක් මතුව තිබිණි.
එවන් වූ රෝහිණී මාරසිංහව ජාජබ නීතීඥ සමුළුවට සම්බන්ධ කරගෙන ඇත්තේ ජාජබ නීති වැඩකටයුතුවල ඉදිරියෙන්ම සිටින නීතීඥවරයකු විසින් බව සඳහන්.
ඔහුගේ මෙම ක්‍රියාව පිළිබඳ ජනතා විමුක්ති පෙරමුණේ ජ්‍යේෂ්ඨයින් ඇතුළු පිරිසක් ඉතා තද විවේචනයක් ඔහුට එල්ල කර ඇති බවත් වාර්තා විය.
හිටපු පාර්ලිමේන්තු මන්ත්‍රීවරයකු වන ජවිපෙ ජ්‍යේෂ්ඨයෙකු “අතේ ඇති ජයග්‍රහණය අනෙක් අයට පවරා දෙන මෙවන් පන්නයේ වැඩ මින් ඉදිරියට නොකරන ලෙස” අදාළ නීතීඥවරයාට තරයේ අවවාද කර ඇති බවත් අභ්‍යන්තර ආරංචිමාර්ග පැවසීය.
RN
