ආසියාවේ ක්‍රිකට් ශූරයන් කවුරුන්දැයි තීරණය කරන ආසියානු කුසලාන අවසාන මහා තරගය තවත් මිනිත්තු කිහිපයකින් ආරම්භවීමට නියමිතය.
ආසියාවේ ප්‍රබලයන් වන ඉන්දියාව පරාජය කරමින් ශ්‍රී ලංකාව හා පකිස්තානය අවසන් තරගයට සුදුසුකම් ලබාගත් අතර අවසන් තරගයේ කාසියේ වාසිය දිනා ගැනීමට පකිස්තානු නායක බාබර් අසාම් සමත් විය. ඔහුගේ ඇරයුමෙන් ශ්‍රී ලංකාවට පළමුව පන්දුවට පහරදීමට සිදුවනු ඇත.
පසුගිය තරග හතරේදීම කාසියේ වාසිය ශ්‍රී ලංකාවට වාසනාවන්ත වූ අතර දෙවැනි ඉනිමේ පන්දුවට පහරදීමේ වාසිය ලබා ගැනීමට ශ්‍රී ලංකාවට සිදුවිය.
කෙසේ නමුත් අද තරගයේදී ඔවුන්ට පළමුව පන්දුවට පහරදී එම ලකුණු ප්‍රමාණය ආරක්ෂා කර ගැනීමට සිදුව තිබේ.
මෙවර තරගාවලියේ මෙතෙක් පැවති තරග 12 න් වැඩි ප්‍රමාණයකදී ලකුණු හඹායාම තෝරා ගත් කණ්ඩායම ජයග්‍රහණය කළ අතර ඒ අනුව පකිස්තානු කණ්ඩායම අවසන් තරගය ආරම්භ කරන්නේ මානසික වශයෙන් යම් ජයග්‍රහණයක් අත්පත් කර ගනිමිනි.
ආසියානු කුසලාන තරගාවලි ඉතිහාසයේ සිව්වැනි වරටත් පකිස්තානය හා ශ්‍රී ලංකාව අවසන් තරගයකදී හමු වූ අතර මීට පෙර අවස්ථා තුනෙන් දෙකක්ම ජයගෙන තිබෙන්නේ ශ්‍රී ලංකාවයි.
මේ වනවිට ශ්‍රී ලංකාව අවස්ථා 05 කදී ආසියාවේ ශූරයන් වී ඇති අතර පකිස්තානය අවස්ථා දෙකකදී ශූරයන් වී තිබෙනවා. ඉදිරි පැය කිහිපය තුළදී හයවැනි වතාවටත් ශ්‍රී ලංකාව ආසියාවේ ක්‍රිකට් ශූරයන් වන්නේද එසේ නැතහොත් තෙවැනි වතාවටත් පකිස්තානය ශූරයන් වන්නේද යන්න තීරණය වනු ඇත.
UN
