රක්ෂිත බන්ධනාගාරගත කර සිටින ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ අද (16) කොටුව මහේස්ත්‍රාත් අධිකරණයට ඉදිරිපත් කිරීමට නියමිතව තිබේ.
එහිදී ඔහුව ශ්‍රීලන්කන් ගුවන් සේවයට එයාර්බස් මිල දී ගැනීමේදී සිදුවූ බව කියන මූල්‍ය අක්‍රමිකතා සහ මුදල් විශුද්ධිකරණ සිද්ධියට අදාළව ප්‍රධාන සැකකරු වශයෙන් නම්කිරීමට නියමිත බව සඳහන්.
අපරාධ පරීක්ෂණ දෙපාර්තමේන්තුවට නීතිපතිවරයා විසින් ලබාදී ඇති උපදෙස් අනුව මෙසේ නාමල් රාජපක්ෂව අදාළ සිද්ධියේ ප්‍රධාන සැකකරු වශයෙන් නම්කෙරෙනු ඇති බවයි ආරංචිමාර්ග පැවසුවේ.
2013 වසරේදී ශ්‍රී ලංකන් ගුවන් සමාගමට A330 වර්ගයේ ගුවන්යානා හයක්, A350 ගුවන්යානා හතරක් මිලදී ගැනීමට සහ තවත් A350 ගුවන්යානා හතරක් බදු පදනම මත ලබාගැනීමට යාමේදී අල්ලස් ලබාගැනීම සම්බන්ධයෙන් එවකට ශ්‍රීලන්කන් ගුවන් සමාගමේ හිටපු විධායක නිලධාරි කපිල චන්ද්‍රෙස්න, ඔහුගේ බිරිය ප්‍රියංකා නියොමාලි සහ හිටපු කථානායක චමල් රාජපක්ෂ මහතාගේ පුත් ශමීන්ද්‍ර රාජපක්ෂ යන අයවලුන් සැකකරුවන් වශයෙන් නම්කරමින් මෙම විමර්ශනය අපරාධ පරීක්ෂණ දෙපාර්තමේන්තුව සහ අල්ලස් කොමිසම ඒකාබද්ධව සිදුකරගෙන යනු ලබයි.
මෙම විමර්ශනයට අදාළව ප්‍රකාශයක් ලබාදීම සඳහා පසුගිය 04 වනදා අල්ලස් කොමිසමට පැමිණි අවස්ථාවේදී නාමල් රාජපක්ෂව අත් අඩංගුවට ගනු ලැබූ අතර එදිනම ඔහුව කොළඹ මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව රක්ෂිත බන්ධනාගාරගත කෙරිණි.
