රෂිකා හෙන්නායක සැප්තැම්බර් 16, කොළඹ LNW :
කොළඹ 07, බාන්ස් පෙදෙසේ පිහිටි දේපළක් සම්බන්ධයෙන් ව්‍යාජ ඔප්පුවක් යොදා ගනිමින් සිදු කළ මහා පරිමාණ ඉඩම් වංචාවකට අදාළව අපරාධ පරීක්ෂණ දෙපාර්තමේන්තුවේ (CID) මූල්‍ය විමර්ශන ඒකකය විසින් සැකකරුවෙකු අත්අඩංගුවට ගෙන තිබේ.
අපරාධ පරීක්ෂණ දෙපාර්තමේන්තුවට ලැබුණු පැමිණිල්ලක් මත ආරම්භ කළ පුළුල් විමර්ශනයකින් අනතුරුව, කළුතර පදිංචි 73 හැවිරිදි මෙම සැකකරු අද (16) කළුතර නගරයේදී අත්අඩංගුවට ගැනිණි.
පොලිසිය පවසන පරිදි, මෙම වටිනා දේපළ සඳහා ව්‍යාජ ඔප්පුවක් සකස් කර, එම ව්‍යාජ ලේඛන අධිකරණ කටයුතු සඳහා ඉදිරිපත් කර, රුපියල් මිලියන 10කට ආසන්න මුදලක් ලබා ගැනීම සඳහා එම දේපළ වංචනික ලෙස විකිණීමට සැකකරු කටයුතු කර ඇත.
අපරාධ පරීක්ෂණ දෙපාර්තමේන්තුවේ මූල්‍ය විමර්ශන ඒකකය මේ සම්බන්ධයෙන් වැඩිදුර විමර්ශන සිදු කරයි.
