2024 ජනාධිපතිවරණය සඳහා ප්‍රචාරණ කටයුතුවල නිරත විය හැකි අවසන් දින දෙක උදා වී තිබේ.
ඒ අනුව අද (17) සහ හෙට (18) යන දින දෙකේදී අපේක්ෂකයින්ට ප්‍රචාරක කටයුතුවල නියැළිය හැකි අතර හෙට මධ්‍යම රාත්‍රී 12.00 ට සියලුම ප්‍රචාරක කටයුතු අවසන් කළ යුතුව ඇත.
මැතිවරණ නීතියට අනුව ඉන් අනතුරුව එළඹෙන දින දෙක නිහඬ කාලය වශයෙන් ප්‍රචාරණ කටයුතුවලින් තොරව පැවතිය යුතු අතර පොලීසිය විසින් සියලු පෝස්ටර්, කටවුට් යනාදිය ඉවත් කළ යුතු ය.
තුන්කොන් සටනක් වශයෙන් පැවති ජනාධිපතිවරණයේදී ජයග්‍රහණය කළ හැකි අපේක්ෂකයින් කවුරුන්ද යන්න පිළිබඳ මේ වනවිට යම් තක්සේරුවක් පවතින නිසා අවසන් මොහොතේ යම් පිල් මාරුවක් සිදුවිය හැකි බවට කටකතා පැතිර යමින් තිබේ.
විශේෂයෙන්ම මේ ජනාධිපතිවරණය කුමන අපේක්ෂකයා ජයග්‍රහණය කළත් හැකි ඉක්මනින් පාර්ලිමේන්තුව විසුරුවා හැරෙන තත්වයක් තුළ මන්ත්‍රීවරුන්ට ඊළඟ මහමැතිවරණය සම්බන්ධයෙන් සිතා තීන්දු තීරණ ගැනීමට සිදුව ඇති බව නොරහසකි.
එසේම පසුගිය දිනවල පක්ෂ මාරු කළ ඇතැම් මන්ත්‍රීවරුන් ද කළකිරීමකින් සිටින බවත් වාර්තා වී තිබිණි.
ඒ අනුව, අවසන් මොහොතේ වෙනත් කඳවුරකට එක්වීමට බලාපොරොත්තු වන මන්ත්‍රීවරුන් අද හෝ හෙට දිනයේදී එය සිදුකරනු ඇති අතර එවන් පිමි කිහිපයක් සඳහා සාකච්ඡා වට කිහිපයක් ද පසුගිය දිනවල පැවැත්වී තිබුණු බවත් දේශපාලන ආරංචිමාර්ග සඳහන් කළේය.
RN
