රෂිකා හෙන්නායක සැප්තැම්බර් 29, කොළඹ LNW :
පාර්ලිමේන්තු මන්ත්රී නාමල් රාජපක්ෂ මහතාට එරෙහිව ගොනු කර ඇති ක්රිෂ් සහ එයාර්බස් නඩු කොළඹ ප්රධාන මහේස්ත්රාත් අධිකරණයේදී යළි කැඳවනු ලැබීය.
එහිදී ක්රිෂ් ගොඩනැගිල්ල ඉදිකිරීම සඳහා ඉන්දියාවෙන් ලැබුණු මුදල් අශුද්ධ මුදල් බවට ඉන්දීය රජයෙන් දැනුම් දී ඇති බව අල්ලස් කොමිසම අධිකරණයට හෙළි කළේය.
මෙම ගනුදෙනු සම්බන්ධයෙන් අල්ලස් ලබාගැනීමේ චෝදනා මත සැකකරු වෙනුවෙන් ඉදිරිපත් කළ ඇප ඉල්ලීම් ප්රතික්ෂේප කෙරුණි.
ඒ අනුව, ක්රිෂ් නඩුව ඔක්තෝබර් 06 දක්වාත්, එයාර්බස් නඩුව ඔක්තෝබර් 13 දක්වාත් මන්ත්රීවරයා රක්ෂිත බන්ධනාගාරගත කිරීමට මහේස්ත්රාත්වරයා නියෝග කළේය.
ඉදිරියේදී නීතිපතිවරයා විසින් මෙම නඩුවලට අදාළව එකම අධිචෝදනා පත්රයක් ඉදිරිපත් කිරීමට අපේක්ෂා කරන බවද අධිකරණයේදී අනාවරණය විය.
පසුව සැකකාර නාමල් රාජපක්ෂ වෙනුවෙන් ජනාධිපති නීතිඥ ශවින්ද්ර ප්රනාන්දු මහතා විමර්ශන අවසන් බවට පැමිණිල්ල සිදුකළ කරුණු දැක්වීම, සුවිශේෂි කරුණක් ලෙස දක්වා සිය සේවාදායකයා වෙනුවෙන් ලිඛිතව නව ඇප අයැදුම්පතක් ඉදිරිපත් කිරීමට අවසර ලබාදෙන ලෙස ඉල්ලා සිට ඇති අතර, ඊට කොළඹ ප්රධාන මහෙස්ත්රාත් අසංග එස්. බෝදරගම මහතා මෙලෙස ප්රතිචාර දක්වා තිබුණි.
” විමර්ශන අවසන් අදියරේ තිබෙන්නේ කියන එක ඔබතුමා පසුගිය ඇප අයැදුමේදීත් සුවිශේෂි කරුණක් ලෙස ඉදිරිපත් කළා. අද දින ප්රකාශයට පත්කළ නියෝගයේ මම ඒ සම්බන්ධයෙනුත් කරුණු පැහැදිලිකර තිබෙනවා. එය කියවලා බලා අවශ්යනම් යළි නව ඇප අයැදුම්පතක් ඉදිරිපත් කරන්න. ඇප අයැදීම ඔබේ අයිතිය. නමුත් ප්රායෝගිකව සෑම නඩුවාරයකදීම ඇප අයැදුම් සිදුකරනවිට ඊට අදාළව නියෝග ලිවීමට අපහසුයි.”
අනතුරුව, එයාර්බස් අල්ලස් චෝදනා සම්බන්ධයෙන් වූ නඩුව අවසානයේ ප්රශ්නගත ක්රිෂ් ගනුදෙනුවේදී රුපියල් මිලියන 70ක අල්ලස් මුදලක් ලබාගත්තේයැයි නාමල් රාජපක්ෂ මන්ත්රීවරයාට එරෙහිව පවතින නඩුව කොළඹ ප්රධාන මහෙස්ත්රාත්වරයා ඉදිරියේ කැඳවනු ලැබීය. එහිදී අල්ලස් හෝ දූෂණ චෝදනා විමර්ශන කොමිෂන් සභාව වෙනුවෙන් එහි සහකාර නීති අධ්යක්ෂ අමා විජේසිංහ මහත්මිය වැඩිදුර විමර්ශන වාර්තාවක් අධිකරණයට ඉදිරිපත් කළාය.
" ස්වාමිනි මේ ප්රශ්නගත සිදුවීමේදී නාගරික සංවර්ධන අධිකාරියට අයත් කොළඹ කොටුව ට්රාන්ස්වර්ක් චතුරශ්රය නැමැති භූමිය Krrish Transworks Colombo (pvt) ltd සමාගමට කඩිනමින් ලබාදීමට අවශ්ය කටයුතු සිදුකිරීම සඳහා තුටු පඬුරක් ලෙස මේ සැකකාර නාමල් රාජපක්ෂ රුපියල් මිලියන 70ක මුදලක් ලබාගෙන තිබෙනවා. මොහුගේ දැනුම සහ එකඟත්වය මත ක්රියාකළ නිමල් පෙරේරා හරහා තමයි එය ලබාගෙන තිබෙන්නේ. මුදල් ලැබුණාද යන්න මොහු විසින්ම පරික්ෂා කිරීමකුත් සිදුකර තිබෙනවා. මේ ක්රියාවලියේදී රාජ්ය ආයතන අසාමාන්ය වේගයකින් කටයුතුකර ඇති බව පෙනෙන්නට තිබෙනවා. ආයෝජන මණ්ඩලය ඊට අදාළ ලේඛන දිනක් තුළ අනුමතකර තිබෙනවා. අදාළ භූමියේ මහබැංකුව මිලියන 150ක ආයෝජනයක් සිදුකර තිබියදී එයත් නොතකා තමයි නාගරික සංවර්ධන අධිකාරියට මේ ඉඩම ලබාදී තිබෙන්නේ. මේ ගනුදෙනුව සම්බන්ධයෙන් සිදුකරන ඒකාබද්ධ විමර්ශනයට අදාළව ඉන්දීය රජයෙන් එවන ලද MLA දැනුම්දීමක් මේ වෙද්දි අපරාධ පරීක්ෂණ දෙපාර්තමේන්තුව සතුව තිබෙනවා. එහි ඉන්දීය රජය සඳහන් කර තිබෙනවා මේ Krrish ගොඩනැගිල්ලට යොදවලා තියෙන්නේ අශුද්ධ මුදල් කියලා. ඊළඟට මේ ප්රශ්නගත ගනුදෙනුව වෙද්දි ශ්රී ලංකා ආයෝජන මණ්ඩලයේ සභාපති ලෙස කටයුතු කරලා තියෙන්නේ මේ සැකකාර නාමල් රාජපක්ෂගේ එක් බාප්පෙක් වන බැසිල් රාජපක්ෂ. ඒ වගේම මේ ඉඩම සම්බන්ධයෙන් කටයුතු කරපු නාගරික සංවර්ධන අමාත්යාංශය යටතේ තිබූ ආරක්ෂක අමාත්යාංශයේ ලේකම්වරයා ලෙස කටයුතු කර ඇත්තේ මේ සැකකරුගේ අනෙක් බාප්පා වන ගෝඨාභය රාජපක්ෂ. ඒ වගේම අනුමැතීන් ලබාදීම, තීන්දු තීරණ ගැනීමේ කටයුතු සිදුවූ අමාත්ය මණ්ඩලයේ ප්රධානියා සහ රටේ ජනාධිපතිවරයාව සිට ඇත්තේ මොහුගේ පියා. මේ සියල්ල මත අරමුණ සඳහා පැවති බැඳීම පැහැදිලිවෙනවා. අපි මේ සම්බන්ධයෙන් කඩිනමින් අධිචෝදනා ගොනුකිරීමට බලාපොරොත්තු වෙනවා. ඒ අනුව දූෂණ විරෝධී පනතේ 149 වගන්තිය ප්රකාරව මේ සැකකරුට එරෙහිව අල්ලස් කොමිසමේ අධ්යක්ෂ ජනරාල්වරයාගේ සහතිකයක් ඉදිරිපත් කර ඇති බැවින් මොහු නඩුවිභාගය අවසන් වනතුරු රක්ෂිත බන්ධනාගාරගත කරන ලෙස ඉල්ලා සිටිනවා. "
අනතුරුව සැකකාර නාමල් රාජපක්ෂ වෙනුවෙන් ජනාධිපති නීතිඥ අලි සබ්රි මහතා ඇප අයැදුමක් ඉදිරිපත් කළේය.
" ස්වාමිනි, මේ නඩුවේ මගේ සේවාදායකයාට එරෙහිව චෝදනා ඉදිරිපත්කර තිබෙන්නේ පරණ අල්ලස් පනත ප්රකාරව. නමුත් ඔය කියන අල්ලස් කොමිසමේ අධ්යක්ෂ ජනරාල්වරයාගේ සහතිකය ඉදිරිපත්කර තිබෙන්නේ නව දූෂණ විරෝධී පනතේ 149 වගන්තිය ප්රකාරවයි. ඒ අනුව පැරණි අල්ලස් පනතේ චෝදනාවකට නව දූෂණ විරෝධී පනත ප්රකාරව සහතිකයක් නිකුත් කිරීම නීත්යානුකූලව වලංගු නැහැ. ඒ වගේම දැනගන්න ලැබුණු විදිහට මාගේ සේවාදායකයා මේ නඩුවට සැකකරුවෙකු ලෙස නම්කරලා තියෙන්නේ ඊයේ. නමුත් සැප්තැම්බර් 18 වනදා තමයි මේ සහතිකය ගොනුකරලා තියෙන්නේ. කොහොමද ඒක එහෙම වෙන්නේ ? මේක Private Mafia එකක් වගේද Run වෙන්නේ. එබැවින් ස්වාමීනි මගේ සේවාදායකයා සම්බන්ධයෙන් ඉදිරිපත්කර ඇති දූෂණ විරෝධී පනතේ 149 වගන්තිය ප්රකාර සහතිකය වලංගු සහතිකයක් නොවන බව මා කියා සිටිනවා."
කෙසේ වෙතත් කොළඹ ප්රධාන මහේස්ත්රාත්වරයා දැනුම් දුන්නේ ඔක්තෝබර් 06 වැනිදා නඩු දිනයේදී ඇප ඉල්ලීම වාචිකව සහ ලිඛිතව ඉදිරිපත් කරන ලෙසය. ඒ අනුව පාර්ලිමේන්තු මන්ත්රී නාමල් රාජපක්ෂ මහතා ක්රිෂ් ගනුදෙනුව සම්බන්ධයෙන් වන නඩුවට අදාළව ඔක්තෝබර් 06 වනදා දක්වාත්, එයාර්බස් ගනුදෙනුව සම්බන්ධයෙන් වන නඩුවට අදාළව ඔක්තෝබර් 13 වනදා දක්වාත් තවදුරටත් රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අසංග එස්.බෝදරගම මහතා නියෝග කළේය.
