කොළඹ LNW:මාර්ගගත ක්රමවල සුරක්ෂිතභාවය පිළිබඳ වූ පනත් කෙටුම්පත අද (03) පාර්ලිමේන්තුවට ඉදිරිපත් කිරීමට නියමිතයි.
පාර්ලිමේන්තුව අද පෙරවරු 09.30ට රැස්වීමට නියමිත අතර, ලබන 6 වනදා දක්වා පළමු සතියේ සැසිවාරය පැවැත්වෙනු ඇති.
අද පෙ.ව. 10.30 සිට ප.ව. 5.00 දක්වා සිවිල් නඩු විධාන සංග්රහය සංශෝධන පනත් කෙටුම්පත දෙවන වර කියවීම පැවැත්වෙන අතර මැතිවරණ විශේෂ විධිවිධාන පනත් කෙටුම්පත දෙවන වර කියවීම සිදුකෙරෙන බවද පාර්ලිමේන්තුවේ සන්නිවේදන දෙපාර්තමේන්තුව සඳහන් කරයි.
සමථ මණ්ඩල පනත යටතේ වන නියෝග විවාදයට ගැනීමට නියමිත අතර අධිකරණ සංවිධාන පනත යටතේ නියමයන් විවාදයට ගැනීමට නියමිතයි.
කෙසේවෙතත් ත්රස්ත විරෝධී පනත් කෙටුම්පත අද දිනයේදී පාර්ලිමේන්තුවට ඉදිරිපත් නොකරන බව අධිකරණ, බන්ධනාගාර කටයුතු හා ආණ්ඩුක්රම ව්යවස්ථා ප්රතිසංස්කරණ අමාත්ය විජයදාස රාජපක්ෂ මහතා සඳහන් කර ඇත.
මාර්ගගත ක්රමවල සුරක්ෂිතභාවය පිළිබඳ වූ පනත් කෙටුම්පත සහ ත්රස්ත විරෝධී පනත් කෙටුම්පත යන පනත් කෙටුම්පත් දෙකම ආණ්ඩුක්රම ව්යවස්ථාවේ මූලික අයිතිවාසිකම්වලට පටහැනි බවට මේ වන විටත් මත ඉදිරිපත් වී තිබෙන නමුත් ආණ්ඩුව ඒ සම්බන්ධයෙන් දක්වන්නේ සාධනීය ප්රතිචාරයකි.
විශේෂයෙන් සමාජ මාධ්ය හරහා අගතියට පත්වන අයෙකුට සාධාරණය ඉටුකර ගැනීම සඳහා අවශ්ය නීතිමය කටයුත්ත නිර්මාණය කිරීම පමණක් මාර්ගගත ක්රමවල සුරක්ෂිතභාවය පිළිබඳ වූ පනත මඟින් සිදුවන බව ජනමාධ්ය රාජ්ය අමාත්ය ශාන්ත බණ්ඩාර මහතා සඳහන් කර තිබේ.
ASK
