රෂිකා හෙන්නායක ඔක්තෝබර් 06, කොළඹ LNW :
ශ්‍රී ලංකාවට යූරියා පොහොර රැගෙන එන නෞකාවක් හෝර්මුස් සමුද්‍ර සන්ධියේ අතරමංව පවතින බව තොරතුරු වාර්තා වේ. එම නෞකාව දැනට ඕමානය ආසන්න මුහුදු තීරයේ නැංගුරම් ලා ඇති බව ජාතික පොහොර ලේකම් කාර්යාලයේ අධ්‍යක්ෂ චන්දන ලොකුහේවාගේ මහතා පැවසීය.
මෙට්‍රික් ටොන් 21,000ක පොහොර තොගයක් රැගත් මෙම නෞකාව එක්සත් අරාබි එමීර් රාජ්‍යයේ සිට පැමිණි එකකි. එම නෞකාව ශ්‍රී ලංකාවට ගෙන්වා ගැනීම සඳහා මේ වන විට සාකච්ඡා පැවැත්වෙමින් පවතින බව අධ්‍යක්ෂවරයා සඳහන් කළේය.
කෙසේ වෙතත්, මහ කන්නයේ වගා කටයුතු සඳහා ප්‍රමාණවත් වන පරිදි යූරියා පොහොර මෙට්‍රික් ටොන් 180,000ක් පමණ දැනට රට තුළ පවතින බව ඔහු පැවසීය. පොහොර මෙට්‍රික් ටොන් 18,000ක් පමණ දැනටමත් ගොවීන් වෙත බෙදා හැර ඇති බව ද ඔහු වැඩිදුරටත් සඳහන් කළේය.
මේ අතර, MOP හෙවත් ‘බැන්ඩි පොහොර’ මෙට්‍රික් ටොන් 27,000ක් රැගත් තවත් නෞකාවක් කොළඹ වරායට පැමිණ තිබේ. එම පොහොර තොගය මේ වන විට ගොඩබෑමේ කටයුතු සිදු කෙරෙමින් පවතින බව පොහොර ලේකම් කාර්යාලය ප්‍රකාශ කළේය.
