රෂිකා හෙන්නායක ඔක්තෝබර් 14, කොළඹ (LNW):
මේ වනවිට අයහපත් කාලගුණයෙන් පුද්ගලයින් එක්ලක්ෂ තිස් හතර දහසකට ( 134000) වැඩි පිරිසක් පීඩාවට පත්ව සිටින අතර, පීඩාවට පත්වූවන්ට සහන සැලසීමේ කටයුතු අඛණ්ඩව ක්‍රියාත්මක බව ආපදා කළමනාකරණ මධ්‍යස්ථානය පවසයි.
දිවයිනට බලපා ඇති අයහපත් කාලගුණය හේතුවෙන් පුද්ගලයින් එක්ලක්ෂ තිස්හතර දහස් හාරසිය අසූහතර දෙනෙකු පීඩාවට පත්ව සිටින අතර, දිස්ත්‍රික්ක 11කට මෙම බලපෑම එල්ලවී ඇති අතර ආරක්ෂිත ස්ථාන 81ක පවුල් 1753කට අයත් පුද්ගලයින් 6963 දෙනෙකු රදවා සිටින බව ආපදා කළමනාකරණ මධ්‍යස්ථානය පවසයි.
ප්‍රාදේශීය ලේකම් කොට්ඨාස 69කට අයහපත් කාලගුණයේ බලපෑම එල්ලවී ඇති අතර විපතට පත්වූවන් මුදා ගැනීමේ හා සහන සැලසීමේ මෙහෙයුම් සදහා ත්‍රිවිධ හමුදාවේ සහ පොලිසියේ සහායද ලැබී තිබෙන අතර, ආපදා තත්ත්වය හේතුවෙන් මේ දක්වා පුද්ගලයින් තිදෙනෙකු ජීවිතක්ෂයට පත්ව ඇති අතර තවත් දෙදෙනෙකු තුවාල ලබා ඇති බව වාර්තා වේ.
නිවාස 240කට අර්ධ වශයෙන් හානි සිදුව ඇත.
මේ අතර අයහපත් කාලගුණය හේතුවෙන් කොළඹ දිස්ත්‍රික්කයේ කොළඹ අධ්‍යාපන කලාපයට අයත් පාසල් අද දිනයේ පමණක් වසා දැමීමට පියවර ගැනුණු අතර, කොළොන්නාව හා කඩුවෙල අධ්‍යාපන කොට්ඨාසවල මෙන්ම ගම්පහ, කැළණිය යන අධ්‍යාපන කලාපවල පාසල් අද (14) සහ හෙට (15) වසා දැමීමට අධ්‍යාපන බලධාරීන් තීරණය කර ඇත.
