රජය විසින් ඉදිරිපත් කර ඇති සංවිධානාත්මක අපරාධ පනත් කෙටුම්පතේ ඇතැම් වගන්ති මගින් බලහත්කාරයෙන් පාපොච්චාරණ සටහන් කර ගැනීම, හිතුමනාපයේ අත්අඩංගුවට ගැනීම් හා රඳවා තබා ගැනීම් සිදු කරමින් වධහිංසා පැමිණවීම, අමානුෂික ලෙස සැලකීම සහ දඬුවම් නොලබා සිටීමේ සංස්කෘතිය තවදුරටත් පවත්වාගෙන යනු ඇති බව ජනාධිපති නීතීඥ සාලිය පීරිස් මහතා පවසයි.
මේ තත්වය තුළ මෙම පනත ශ්‍රී ලංකාවේ ආර්ථිකයට අත්යාවශ්‍ය වන GSP+ බදු සහනයට ද අහිතකර ලෙස බලපෑමට හැකි බවයි ඒ මහතා පෙන්වා දෙන්නේ.
ජනාධිපති නීතීඥ සාලිය පීරිස් මහතා සිය ෆේස්බුක් පිටුවේ තබා ඇති සටහන පහතින් දැක්වේ.
**********************
ත්‍රස්තවාදය වැළැක්වීමේ පනත (PTA) ප්‍රතිසංස්කරණය කිරීම හෝ අහෝසි කිරීම සඳහා වන ඉල්ලීම්වලට පිළිතුර ලෙස රජය විසින් නව ත්‍රස්තවාදයෙන් ආරක්ෂාවීමේ පනත් කෙටුම්පත (PSTA) ඉදිරිපත් කර ඇත. ආර්ථිකයට අත්‍යවශ්‍ය යැයි සැලකෙන GSP+ සහනය තවදුරටත් ලබා ගැනීම සඳහා ත්‍රස්තවාදයට එරෙහි නීති ප්‍රතිසංස්කරණය කිරීමට ශ්‍රී ලංකා රජයන් පොරොන්දු වී ඇති බැවින් මෙය වඩාත් වැදගත් වේ.
PSTA පනත මගින් පොරොන්දු වී ඇති ප්‍රධාන ප්‍රතිසංස්කරණ අතර, සහකාර පොලිස් අධිකාරී (ASP) ශ්‍රේණියට ඉහළ පොලිස් නිලධාරීන්ට කරනු ලබන පාපොච්චාරණ සාක්ෂි ලෙස පිළිගැනීමේ ප්‍රතිපාදනය අහෝසි කිරීම ප්‍රධාන වේ. අතීත අත්දැකීම්වලින් අප දන්නේ PTA පනත යටතේ පාපොච්චාරණ සටහන් කරගැනීම, පොලිසිය සහ ආරක්ෂක අංශ විසින් වධහිංසා පැමිණවීම සහ අමානුෂික ලෙස සැලකීමේ සංස්කෘතියකට මග පෑදූ බවයි.
දැන්, රජය විසින් PSTA පනත යටතේ ‘පාපොච්චාරණ’ අහෝසි කරන බවට යුරෝපීය සංගමය ඇතුළු ජාත්‍යන්තර ප්‍රජාවට පෙන්වා දෙන අතරතුර, රජය විසින් “සංවිධානාත්මක අපරාධ පනත් කෙටුම්පත” නමින් වෙනම පනත් කෙටුම්පතක් ප්‍රකාශයට පත් කර ඇත.
මෙම පනත් කෙටුම්පත යටතේ, ASP සහ ඊට ඉහළ නිලධාරීන්ට කරනු ලබන පාපොච්චාරණ, විත්තිකරුවන්ට එරෙහිව උසාවියේදී සාක්ෂි ලෙස පිළිගත හැකිය. මෙය දැනට PTA පනතේ ඇති සහ PSTA මගින් අහෝසි කිරීමට නියමිත ප්‍රතිපාදනවලට සර්වසම වේ.
මෙම නව සංවිධානාත්මක අපරාධ පනත් කෙටුම්පත යටතේ, සැකකරුවන්ට ඇප ලබාගත හැක්කේ මහාධිකරණයෙන් පමණක් වන අතර, අත්අඩංගුවට ගත් සැකකරුවන්ට එරෙහිව කිසිදු සාක්ෂියක් නොමැති වුවද, පොලිසිය විසින් අත්අඩංගුවට ගෙන ඉදිරිපත් කර ඇති නිසාම ඔවුන් රක්ෂිත බන්ධනාගාරගත කිරීමට මහේස්ත්‍රාත්වරුන්ට සිදුවේ.
එක් ප්‍රතිපාදනයක් මගින් යම් තැනැත්තෙකුගේ කොණ්ඩා මෝස්තරය, පච්ච (tattoos) හෝ ඇඳුම් පැළඳුම් මත පදනම්ව, එම තැනැත්තා සංවිධානාත්මක අපරාධ කල්ලියක සාමාජිකයෙකු බවට නිගමනයකට එළඹීමට උසාවියට ඉඩ සලසයි.
ඉතා ඉක්මනින්, පොලිසිය විසින් සුදුසු නැතැයි සලකන දිගු කොණ්ඩය සහ පච්ච තිබීම නිසා මිනිසුන් අත්අඩංගුවට ගෙන දීර්ඝ කාලයක් රක්ෂිත බන්ධනාගාරගත කරනු ඇත.
PSTA පනත භාවිතා කරනවා වෙනුවට, සංවිධානාත්මක අපරාධ පනත භාවිතා කරමින් පාපොච්චාරණ සටහන් කර ගැනීම සහ හිතුමනාපයේ අත්අඩංගුවට ගැනීම් හා රඳවා තබා ගැනීම් සිදු කරමින් වධහිංසා පැමිණවීම, අමානුෂික ලෙස සැලකීම සහ දඬුවම් නොලබා සිටීමේ සංස්කෘතිය තවදුරටත් පවත්වාගෙන යනු ඇත.
මානව හිමිකම් පිළිබඳ ප්‍රශ්නවලට පිළිතුරු දීමට සහ GSP+ සහනය තහවුරු කර ගැනීමට මෙවැනි ක්‍රියාමාර්ග හරහා යුරෝපීය සංගමය සහ ජාත්‍යන්තර ප්‍රජාව සාර්ථකව නොමග යැවිය හැකි වේවිද?
