රෂිකා හෙන්නායක ඔක්තෝබර් 26, කොළඹ (LNW):
2025 වසරේ ජනවාරි මස සිට රාජ්‍ය සේවකයන්ගේ වැටුප වැඩි කිරිමට ප්‍රතිපාදන වෙන් කර තිබු බවට හිටපු ජනාධිපති රනිල් වික්‍රමසිංහ මහතා සිදු කරන ප්‍රකාශ අසත්‍ය බව ජාතික ජන බලවේගයේ විධායක කමිටු සමාජික, මහනුවර දිස්ත්‍රික් කණ්ඩායම් නායක සහ අපෙක්ෂක ලාල් කාන්ත මහතා පවසයි.
නාවලපිටිය ප්‍රදේශයේ ජාතික ජන බලවේගයේ මහ මැතිවරණ ප්‍රචාරක වැඩසටහනකට එක්වෙමින් ලාල් කාන්ත මහතා ඒ බැව් කියා සිටියේය.
එසේ රනිල් වික්‍රමසිංහ මහතා රාජ්‍ය සේවකයින්ට ගෙවීමට ප්‍රතිපාදන වෙන් කර තිබුණා නම් එම මුදල් ඔහු ගෙදර රැගෙන යන්නට ඇති බව මෙහිදි වැඩිදුරටත් අදහස් දැක් වු ලාල් කාන්ත මහතා කියා සිටියේය.
ජනාධිපතිවරණයෙන් පරාජය වී නිවසට වි විශ්‍රාම සුවයෙන් සිටිම වෙනුවට මෙවැනි ප්‍රකාශ සිදු කිරිම හාස්‍යයට කරුණක් බව ලාල් කාන්ත මහතා වැඩිදුරටත් කියා සිටියේය.
අත්‍යවශ්‍ය ආහාර මිල ඉහල ගොස් ඇති බව සහ රටේ ආරක්ෂාවට තර්ජනයක් එල්ල වී ඇති බව පවසමින් ඇතැම් පිරිස් මැතිවරණ ප්‍රචාරක කටයුතු සිදු කරන බවත්, එම අසත්‍ය ප්‍රකාශවලට නොවැම්බර් මස (14) දින රටේ බහුතර පිරිසක් පිලිතුරු ලබාදෙන බව ඔහු පවසා සිටී.
නොවැම්බර් (14) දිනයෙන් පසු ජාතික ජන බලවේගය කැබ්නට් ඇමතිවරුන් 25 දෙනෙකුගෙන් සහ නියෝජ්‍ය ඇමතිවරුන් 25 දෙනෙකුගෙන් යුත් ශක්තිමත් ආණ්ඩුවක් පත් කිරිමෙන් පසු රටේ තිබෙන සියළුම ප්‍රශ්න වලට විසදුම් ලබාදෙන බව ලාල් කාන්ත මහතා වැඩිදුරටත් කියා සිටී.
