විශේෂ ලිපිකරුවකු විසිනි
නොවැම්බර් 03, කොළඹ (LNW): බණ්ඩාරනායක ජාත්‍යන්තර ගුවන්තොටුපළේ 2 වන පර්යන්ත ව්‍යාපෘතිය (BIA Terminal 2) සම්බන්ධයෙන් ප්‍රබල ටෙව්ඩර් වංචාවක් සිදුවන බවට තොරතුරු ලැබෙමින් පවතියි.
ජපානයේ තායිසෙයි සමාගම (Taisei Corporation) තමන් මුලින් ඉදිරිපත්කළ ටෙන්ඩර් මිලට වඩා ඇමරිකානු ඩොලර් මිලියන 190ක අධික මුදලක් ඉල්ලා සිටින අතර, ගුවන්තොටුපළ භාර අමාත්‍යාංශයේ ලේකම්වරයා එම සමාගමට වාසිදායක වන ලෙස සාකච්ඡා සඳහා සක්‍රීයව මැදිහත් වන බවට බරපතල චෝදනා එල්ලවන බවයි ආරංචිමාර්ග සඳහන් කළේ.
මෙහි වඩාත්ම කනගාටුදායක චෝදනාව වන්නේ හුදෙක් සිදු වී ඇති අධික මිල ඉහළ නැංවීම පමණක් ම නොවේ; රටේ මුදල් හා අයිතිවාසිකම් සුරැකීමට බැඳී සිටින මෙම ජ්‍යෙෂ්ඨතම රාජ්‍ය නිලධාරියාගේ ක්‍රියාකලාපයයි.
සාකච්ඡා ක්‍රියාවලිය සම්බන්ධයෙන් මතුව ඇති සැකසංකා වලට අනුව, අමාත්‍යාංශ ලේකම්වරයා තායිසෙයි සමාගමේ වාණිජමය ස්ථාවරය වෙනුවෙන් පෙනී සිටිමින්, රජයේ අභ්‍යන්තර කරුණු සම්බන්ධ සාකච්ඡා සඳහා එම සමාගමේ සහභාගීත්වය පහසු කර ඇති බවටත්, තාක්ෂණික ඇගයීම් නිලධාරීන්ගේ විරෝධය හමුවේ වුව ද මෙම මිල ඉහළ දැමීම අනුමත කරගැනීමට උත්සාහ කරන බවටත් චෝදනා එල්ල වී ඇත.
මහජන මුදල් ආරක්ෂා කිරීමට භාර දී ඇති නිලධාරියා, අමතර ඩොලර් මිලියන 190ක් ලබාගැනීමට උත්සාහ කරන කොන්ත්‍රාත්කරුගේ නියෝජිතයකු බවට පත්ව සිටින්නේද යන ගැටළුව මෙහිදී මතුවේ.
මෙම ක්‍රියාකලාපයේ බරපතලකම සලකා බලන විට මේ පිළිබඳව වහාම පරීක්ෂණයක් පැවැත්විය යුතුය.
තාක්ෂණික ඇගයීම් නිලධාරීන් හයදෙනෙකුගේ විරෝධය – නමුත් ලේකම්වරයාට ගානක්වත් නෑ?
අතිශය ආන්දෝලනාත්මක පුවතක් වන්නේ, තාක්ෂණික ඇගයීම් කමිටුවේ (TEC) සාමාජිකයන් හයදෙනෙකු මෙම යෝජිත මිල ඉහළ දැමීම අනුමත කිරීම ප්‍රතික්ෂේප කර ඇති බවට වාර්තා වීමයි.
ස්වාධීන තාක්ෂණික ක්‍රියාවලියට නිසි නිගමනයකට පැමිණීමට ඉඩ දෙනවා වෙනුවට, අමාත්‍යාංශ ලේකම්වරයා මෙම බලපෑම සහ විරෝධය මැඬපවත්වා ඉදිරියට යාමට උත්සාහ කරන බවට චෝදනා එල්ල වේ.
මෙය තහවුරු වුවහොත්, එය ප්‍රසම්පාදන පාලන ක්‍රමවේදයේ බරපතල සහ භයානක බිඳවැටීමක් පෙන්නුම් කරනු ඇත.
තාක්ෂණික ඇගයීම් කමිටු යනු ප්‍රබල නිලධාරීන් විසින් දැනටමත් ගන්නා ලද තීරණ සඳහා රබර් මුද්‍රා තැබීමට පිහිටුවා ඇති නාමික මණ්ඩල නොවේ. ඔවුන්ගේ වගකීම වන්නේ ස්වාධීන තාක්ෂණික හා වාණිජමය ඇගයීම් හරහා රාජ්‍යය ආරක්ෂා කිරීමයි.
නුසුදුසු මිල ඉහළ දැමීමක් පිළිගන්නා ලෙස කමිටු සාමාජිකයන්ට බලපෑම් කිරීමට කරන ඕනෑම උත්සාහයක් සම්බන්ධයෙන් හදිසි පරීක්ෂණයක් පවත්වා සුදුසු විනය පියවර ගත යුතුය.
ඩොලර් මිලියන 250ක් අඩුවෙන් ඉදිරිපත් කළ ලංසුකරු ඉවත් කෙරේ – දැන් තවත් ඩොලර් මිලියන 190ක් ඉල්ලනවා ද?
මෙම ටෙන්ඩරය සඳහා තායිසෙයි සමාගම (Taisei Corporation) සහ සෝජිට්ස් – ලාසන් ඇන්ඩ් ටූබ්‍රෝ (Sojitz–Larsen & Toubro) සප්‍රසාදිකය (consortium) තරඟ කළ අතර, එහිදී Sojitz–L&T සප්‍රසාදිකය තාක්ෂණික වශයෙන් සුදුසුකම් නොලබන (technically non-responsive) බවට ප්‍රකාශයට පත්කළ අතර, තායිසෙයි සමාගම එකම සුදුසුකම් ලත් ලංසුකරු ලෙස ඉතිරි විය. පසුව JICA ආයතනය ද මෙම තේරීමේ ක්‍රියාවලියට එකඟතාව පළ කළේය.
කෙසේ වෙතත්, ඉවත් කරන ලද අනෙක් ලංසුව තායිසෙයි සමාගමේ ලංසුවට වඩා ඩොලර් මිලියන 250කින් පමණ අඩු අගයක් ගත් බව වාර්තා වේ.
දැන්, එකම තාක්ෂණික සුදුසුකම් ලත් ලංසුකරු ලෙස ඉතිරි වීමෙන් පසුව, තායිසෙයි සමාගම තවත් ඩොලර් මිලියන 190ක අමතර මුදලක් ඉල්ලන බවට වාර්තා වේ.
වාර්තා වූ මෙම සංඛ්‍යා දෙකම තහවුරු වුවහොත්, අනෙක් ලංසුව සහ තායිසෙයි සමාගමේ යෝජිත සංශෝධිත මිල අතර මුළු වෙනස ඇමරිකානු ඩොලර් මිලියන 440ක අතිදැවැන්ත අගයක් ගනී.
අඩු ලංසුව තාක්ෂණික වශයෙන් පිළිගත හැකි එකක් වූ බවට මෙය සාක්ෂියක් නොවුන ද, එයින් මඟහැරිය නොහැකි ප්‍රශ්නයක් මතුවේ: මෙම ප්‍රසම්පාදන ක්‍රියාවලිය මඟින් ශ්‍රී ලංකාවට සැබවින්ම හොඳම වටිනාකම අත්කර දී තිබේද?
මැද පෙරදිග අර්බුදය නිදහසට කරුණක් කරගන්නේ ද?
තායිසෙයි සමාගම මෙම අමතර මුදල් ඉල්ලීමට හේතුව ලෙස දක්වා ඇත්තේ මැද පෙරදිග අර්බුදය නිසා ගොඩනැගිලි ඉදි කිරීමේ පිරිවැය ඉහළ යාමයි.
භූ-දේශපාලනික අර්බුදයන් නිසා ප්‍රවාහන, බලශක්ති, රක්ෂණ සහ ද්‍රව්‍ය පිරිවැය ඉහළ යා හැකි නමුත්, එවැනි ඉහළ යාම් ස්වාධීනව තහවුරුකළ පිරිවැය ගණනය කිරීම් මඟින් සනාථ කළ යුතුය.
එසේම, තායිසෙයි සමාගමේ මුල් මිලම 30%කට වඩා වැඩි ප්‍රමාණයකින් ඉහළ දමා තිබූ එකක් බවටත්, අර්බුදයේ සමස්ත පිරිවැය බලපෑම දැනට ඉල්ලා සිටින අමතර මුදලට වඩා සැලකිය යුතු ලෙස අඩු එකක් බවටත් චෝදනා නැඟී ඇත. මෙම ප්‍රකාශ සම්බන්ධයෙන් ස්වාධීන තහවුරු කිරීමක් අවශ්‍ය වේ.
ශ්‍රී ලංකාවේ ප්‍රසම්පාදන පද්ධතිය මඟින් ලංසු සංශෝධන සහ සාකච්ඡා සම්බන්ධයෙන් තදබල පාලනයක් පනවා ඇත. කොන්ත්‍රාත්කරුවකුගේ වාණිජමය ඉල්ලීම්වලට තරඟකාරීත්වය, පාරදෘශ්‍යභාවය සහ මුදලට ලැබෙන වටිනාකම යන මූලධර්ම අභිබවා යා නොහැක.
2 වන පර්යන්තයේ කටයුතු ඉක්මනින් අවසන් කිරීමේ අවශ්‍යතාවය, ශ්‍රී ලාංකික බදු ගෙවන්නන්ගෙන් සාධාරණ නොවන අමතර මුදලක් ලබා ගැනීමට ආයුධයක් කරගත නොහැක.
ජනාධිපතිතුමනි, ඔබගේ දූෂණ විරෝධී පොරොන්දුව මැන බලන සැබෑ පරීක්ෂණය මෙයයි
ජනාධිපති අනුර කුමාර දිසානායක මහතාගේ රජය බලයට පත් වූයේ දූෂණය, දේශපාලන රැකවරණය සහ මහජන මුදල් අවභාවිතය අවසන් කිරීමේ ප්‍රබල කැපවීම මත ය.
නමුත් මෙම වත්මන් මතභේදය මඟින් මතු වන්නේ, ආණ්ඩු වෙනස් වුවද, ප්‍රශ්නගත ප්‍රසම්පාදන ක්‍රමවේදයන් සහ බලපෑම් ජාලයන් එලෙසම පැවතිය හැකි බවට වන භයානක සැකයයි.
ජනාධිපතිවරයා දැන් වහාම මේ සඳහා මැදිහත් විය යුතුය.
වාර්තා වන ඩොලර් මිලියන 190ක මිල ඉහළ නැංවීම ස්වාධීන සමාලෝචනයක් සිදුවන තෙක් අත්හිටුවිය යුතුය. TEC සාමාජිකයන්ගේ විරෝධතා පරීක්ෂාකළ යුතු අතර, අමාත්‍යාංශ ලේකම්වරයාගේ මැදිහත්වීම් පිළිබඳව පරීක්ෂණ පැවැත්විය යුතුය. එමෙන්ම තරඟකාරී ලංසු ඇගයීම් සහ සාකච්ඡා සටහන් සූක්ෂම ලෙස පරීක්ෂාවට ලක් කළ යුතුය.
නිසි ලෙස සංවිධානය කරන ලද නැවත ලංසු කැඳවීමේ ක්‍රියාවලියක් (rebidding process) මඟින් තරඟකාරීත්වය නැවත ඇති කර සැලකිය යුතු මුදලක් ඉතිරි කර ගත හැකි ද යන්න පිළිබඳව රජය JICA ආයතනය සමඟ සාකච්ඡාකර ඇගයිය යුතුය. ඩොලර් මිලියන සිය ගණනක් ආරක්ෂා කර ගැනීම වෙනුවෙන් තවත් මාස තුනක් වැය කිරීම වුව ද සුළු කැපකිරීමකි.
මෙය වැදගත් ජාතික ව්‍යාපෘතියක් ප්‍රමාද කිරීම හෝ ශ්‍රී ලංකාවට ජපානය දක්වන අඛණ්ඩ සහයෝගයට හානි කිරීම පිළිබඳ ප්‍රශ්නයක් නොවේ. මෙහි අරමුණ වන්නේ සුදුසු නොවන බලපෑම්වලින් තොර ක්‍රියාවලියක් හරහා සාධාරණ මිලකට ගුවන්තොටුපළ ඉදිකිරීම සහතික කිරීමයි.
ඩොලර් මිලියන 190ක් යනු තවත් ප්‍රධාන ජාතික යටිතල පහසුකම් සඳහා අරමුදල් සැපයීමට ප්‍රමාණවත් මුදලකි. එය ප්‍රශ්නගත සාකච්ඡා හරහා ශ්‍රී ලංකාවට අහිමි කරගත හැකි මුදලක් නොවේ.
අමාත්‍යාංශ ලේකම්වරයාට එරෙහි චෝදනා සහ වාර්තා වන TEC විරෝධතා සම්බන්ධයෙන් සාධාරණ ලෙස පරීක්ෂණ පැවැත්විය යුතු අතර, සියලු පාර්ශවයන්ට පිළිතුරු දීමට අවස්ථාව ලබා දිය යුතුය. නමුත් අධික ලෙස මිල ඉහළ දැමූ ගිවිසුමකට අත්සන් තබන තෙක් බලා සිටීමෙන් මෙම අධීක්ෂණයේ අරමුණ ඉටු නොවේ.
ජනාධිපතිතුමනි, මෙම ප්‍රශ්නගත මිල ඉහළ දැමීම වහාම නවත්වන්න. තාක්ෂණික ඇගයීම් නිලධාරීන් ආරක්ෂා කරන්න. සිදු වූ බව කියන බලපෑම් ගැන පරීක්ෂණ පවත්වන්න. ප්‍රසම්පාදන ක්‍රියාවලියේ විනිවිදභාවය නැවත ඇති කරන්න. ජනතාවගේ මුදල් ආරක්ෂා කරන්න.
ඔබගේ රජය දූෂණයට එරෙහිව සටන් කරන බවට පොරොන්දු විය. එය ක්‍රියාවෙන් ඔප්පු කිරීමට ලැබුණු අවස්ථාව මෙයයි.
මුළු රටම බලා සිටියි!
