සටහන – නිපුනි ලියනගේ
කොළඹ (LNW): රටට අවශ්‍ය විදේශ විනිමය ගලා ඒම 2023 සැප්තැම්බර් මාසයේදී රුපියල් මිලියන 640 ක ඉහළ අගයක් වාර්තා කරමින් රටේ විදේශ අංශයේ ප්‍රකෘතියක් පෙන්නුම් කරයි.
ශ්‍රමිකයන්ගේ ප්‍රේෂණ 2022 සැප්තැම්බර් මාසයේදී ඩොලර් මිලියන 359 සහ 2023 අගෝස්තු මාසයේදී ඩොලර් මිලියන 499 ට සාපේක්ෂව 2023 සැප්තැම්බර් මාසයේදී ඇමරිකානු ඩොලර් මිලියන 482 දක්වා ඉහළ ගොස් ඇති බව මහ බැංකු දත්ත පෙන්වා දෙයි.
මේ අතර, තාවකාලික දත්ත මත පදනම්ව, 2022 වසරේ වාර්තා වූ විදේශ රැකියා සඳහා වූ මුළු පිටවීම් 311,056 ට සාපේක්ෂව 2023 සැප්තැම්බර් සහ 2023 ජනවාරි සිට සැප්තැම්බර් දක්වා කාලය තුළ මුළු පිටවීම් පිළිවෙළින් 25,648 සහ 222,794 ක් විය.
2023 අගෝස්තු මාසයේදී වාර්තා වූ සංචාරක පැමිණීම් 136,405 හා සසඳන විට 2023 සැප්තැම්බර් මාසයේදී සංචාරක පැමිණීම් 111,938 දක්වා අඩු විය.
කෙසේ වෙතත්, සංචාරක පැමිණීම් 2022 වසරේ අනුරූප කාලපරිච්ඡේදය තුළ වාර්තා වූ 526,232 ට සාපේක්ෂව 2023 ජනවාරි සිට සැප්තැම්බර් දක්වා කාලය තුළ 1,016,256 සැලකිය යුතු වර්ධනයක් පෙන්නුම් කරයි.
2023 සැප්තැම්බර් මාසයේදී සංචාරක ඉපැයීම් ඇමෙරිකානු ඩොලර් මිලියන 152ක් ලෙස ඇස්තමේන්තු කර ඇත. ජර්මනිය සහ රුසියාව 2023 සැප්තැම්බර් මාසය තුළ සංචාරක පැමිණීම් සඳහා ප්‍රධාන මූලාශ්‍ර රටවල් විය.
2023 ජනවාරි සිට සැප්තැම්බර් දක්වා කාලය තුළ සමුච්චිත ශුද්ධ ගලා ඒම ඇමෙරිකානු ඩොලර් මිලියන 335ක් ලෙස සටහන් විය.
