සටහන – පුලී
නොවැම්බර් 14, LNW (කොළඹ): විලාසිතා ලෝකයේ අලංකාරය, ආදරයේ මිහිරියාව, මිත්‍රත්වයේ වටිනාකම වගේම ජීවිතයේ නොසිතූ හැරවුම් රැසක් එකට කැටි කළ ජනප්‍රිය රූපවාහිනී කතා මාලාවක් වන Emily in Paris නැවතත් ලොව පුරා රසිකයන්ගේ අවධානය දිනාගැනීමට සූදානම් වෙමින් පවතී. මෙවර එය තවත් විශේෂ වන්නේ එමීලි කූපර්ගේ කතාවේ හයවැනි කතා සමය අවසන් කතා සමය වීම නිසයි. ඒ අනුව එමීලිගේ ආදරය, වෘත්තීය ජීවිතය සහ පැරිසියේ ගෙවුණු සුන්දර අත්දැකීම්වල අවසානය කෙසේ සිදුවේවිද යන්න පිළිබඳව මේ වන විටත් රසිකයන් අතර දැඩි කුතුහලයක් නිර්මාණය වී තිබේ.
Netflix කතා මාලාවක් ලෙස ප්‍රේක්ෂක ආකර්ෂණය දිනාගත් මෙහි ප්‍රධාන චරිතය වන එමීලි කූපර්ගේ චරිතයට පණ පොවන්නේ ජනප්‍රිය හොලිවුඩ් නිළි Lily Collins විසිනුයි. ඇමරිකාවේ සිට පැරිසියට පැමිණෙන තරුණ අලෙවිකරණ වෘත්තිකයෙකු ලෙස ඇරඹෙන ඇගේ ගමන, කාලයත් සමඟ ආදරය, රැකියාව, සංස්කෘතික වෙනස්කම් සහ පෞද්ගලික තීරණ රැසක් හමුවේ වෙනස් වන ආකාරය මෙතෙක් කතා සමයන් තුළින් දැකගත හැකි විය.
කතාවේ ආරම්භක කාලයේදී එමීලිට උපදෙස් ලබාදුන් සිල්වී ග්‍රැටෝගේ වචන අදටත් රසිකයන්ට අමතක නැහැ. Philippine Leroy-Beaulieu විසින් නිරූපණය කරන සිල්වී, එමීලිට වරක් ලබාදුන් උපදෙස වූයේ ආදරය කිරීමටත්, වැරදි කිරීමටත්, පැරිසියේ ජීවිතය උපරිමයෙන් අත්විඳීමටත් බිය නොවන ලෙසයි.
ඇයගේ සුප්‍රසිද්ධ උපදෙස වූයේ, “Fall in love, make mistakes. If you’re going to do Paris, for God’s sake do it right” යන්නයි.
එම උපදෙසට අනුව ජීවිතයේ විවිධ අභියෝගවලට මුහුණ දෙමින් ඉදිරියට ගිය එමීලි, මෙවර අවසන් කතා සමයේදීත් අලුත් අත්දැකීම් සොයා යන බව පළමු ටීසරයෙන් පැහැදිලි වේ. එමීලිගේ ගමනේ අවසන් පරිච්ඡේදය තුළ ආදරය සහ ජීවිතයේ තීරණාත්මක අවස්ථා තවත් වැදගත් ස්ථානයක් හිමිකරගනු ඇත.
හයවැනි කතා සමය පිළිබඳ වැඩිම අවධානයක් දිනාගත් කරුණක් වන්නේ එමීලි සහ ගේබ්‍රියෙල් අතර සම්බන්ධයයි.
Lucas Bravo විසින් නිරූපණය කරන ගේබ්‍රියෙල්, එමීලිගේ ජීවිතයේ ආරම්භයේ සිටම වැදගත් චරිතයක් බවට පත්ව සිටි අතර ඔහු වෘත්තියෙන් සූපවේදියෙකු වන අතර එමීලි සමඟ ඇති ඔහුගේ ආදර සම්බන්ධය කතා මාලාවේ ප්‍රේක්ෂකයන් වැඩි වශයෙන් කතාබහ කළ මාතෘකාවක්.
කෙසේ වෙතත්, ඔවුන්ගේ ආදර කතාව සරල එකක් වුණේ නැහැ. විවිධ වැරදි වැටහීම්, වෙනත් සම්බන්ධතා, වෙන්වීම් සහ නැවත හමුවීම් හරහා ඔවුන්ගේ සම්බන්ධය නිරන්තරයෙන්ම වෙනස් වූ බවක් ප්‍රේක්ෂකයන්ට දැක ගන්න ලැබුණි.
නවතම ටීසරයේදී එමීලි සහ ගේබ්‍රියෙල් අතර නැවතත් යම් සමීප බවක් දැකගත හැකි වීම රසිකයන්ගේ බලාපොරොත්තු අලුත් කර තිබෙනවා. විශේෂයෙන්ම ගේබ්‍රියෙල්ගේ පෙනුමත් සමඟ එමීලි පුදුමයට පත්වන දර්ශනය පිළිබඳව විවිධ අදහස් පළවෙමින් තිබේ.
එහෙත් ඔවුන් දෙදෙනා නැවතත් ආදරයෙන් බැඳේවිද? නැතිනම් අතීතයේ සිදුවූ සිදුවීම් ඔවුන්ගේ අනාගතයට නැවතත් බාධාවක් වේවිද?
පස්වැනි කතා සමයේදී එමීලිගේ ජීවිතයට ඇතුළු වූ තවත් වැදගත් චරිතයක් වන්නේ ඉතාලි ජාතික මාර්සෙලෝ මුරටෝරි (Marcello Muratori) යි. Eugenio Franceschini විසින් නිරූපණය කරන ඔහු, ඉතාලි කැෂ්මියර් ව්‍යාපාරික පවුලක උරුමකරුවෙකු ලෙස කතාවට එක්වනවා ඇත.
එමීලි සහ මාර්සෙලෝ අතර ඇතිවන ආදර සම්බන්ධයත් සමඟ කතාව පැරිසියෙන් ඉතාලියට විහිදෙන අතර රසිකයන්ට ඉතාලියේ සුන්දර පරිසරය සහ එහි ජීවන රටාව දැකගැනීමට අවස්ථාව ලැබී තිබුණි.
නමුත් අවසානයේදී ඔවුන්ගේ ආදර සම්බන්ධය සදහටම අවසන් වනවා. එම සම්බන්ධයෙන් පසුව එමීලි නැවත පැරිසියට පැමිණෙන්නේ ඇගේ ජීවිතයේ ඊළඟ පියවර කුමක්ද යන්න තීරණය කළ යුතු අවස්ථාවකයි.
පස්වැනි කතා සමයේ අවසානයේදී ගේබ්‍රියෙල් එමීලිට විශේෂ ආරාධනාවක් සිදු කරනවා. ඒ ඔහුගේ ප්‍රධානියාට අයත් සුඛෝපභෝගී යාත්‍රාවකින් ග්‍රීසියට පැමිණෙන ලෙසයි.
මෙම ආරාධනාව හයවැනි කතා සමයේ කතාවට වැදගත් ආරම්භයක් ලබාදෙන බව පෙනී යයි.
ග්‍රීසියේ සුන්දර දූපත්, නිල් පැහැති මුහුද, හිරු එළියෙන් බබළන වෙරළ තීරයන් සහ සුඛෝපභෝගී යාත්‍රා සංචාර සමඟ එමීලිගේ අලුත් අත්දැකීම් රසිකයන්ට දැකගැනීමට හැකි වනු ඇති.
නවතම තොරතුරු අනුව Emily in Paris හයවැනි සහ අවසන් කතා සමය දෙසැම්බර් 24 වැනිදා සිට ප්‍රේක්ෂකයන් වෙත ගෙන ඒමට නියමිතයි.
එමීලිගේ ආදර කතාවට අවසානයේදී හිමිවන්නේ ගේබ්‍රියෙල්ද? ඇයගේ අනාගතය පැරිසියේම රැඳේවිද? නැතිනම් ඇගේ ජීවිතය තවත් අලුත් රටකින් ආරම්භ වේවිද?
වසර ගණනාවක් පුරා විලාසිතා, ආදරය සහ පැරිසියේ සුන්දරත්වය සමඟ රසිකයන්ගේ හදවත් දිනාගත් එමීලිගේ කතාවට මෙවර ලැබෙන අවසානය කුමක්ද යන්න දැනගැනීමට ලොව පුරා රසිකයන් නොඉවසිල්ලෙන් බලා සිටී.
පැරිසියෙන් ඇරඹුණු මේ අපූරු ගමනේ අවසන් නැවතුම ආදරයෙන් පිරුණු එකක් වේවිද? එසේත් නැතිනම් එමීලි වෙනුවෙන් තවත් පුදුම සහගත හැරවුමක් බලා සිටිනවාද? ඒ සියල්ලට පිළිතුරු දෙසැම්බර් 24 වැනිදා සිට දිගහැරෙන අවසන් කතා සමයෙන් දැනගත හැකි වනු ඇත.
