එළඹෙන දෙසැම්බර් උත්සව සමය වෙනුවෙන් සහල් මෙට්‍රික් ටොන් ලක්ෂයක් ආනයනය කිරීමට කැබිනට් අනුමැතිය හිමිව ඇති බව වෙළඳ අමාත්‍ය නලින් ප්‍රනාන්දු මහතා පවසයි.
ඒ අනුව සම්බා සහ කීරිසම්බා සඳහා ආදේශක සහල් ආනයනය කිරීමට කඩිනමින් කටයුතු කරන බවයි අමාත්‍යවරයා සඳහන් කළේ.
ඒ තුළින් ද සහල් මිල පාලනය කරගැනීමට නොහැකි වුවහොත් ආනයනය කරන සහල් ප්‍රමාණය තවදුරටත් වැඩිකිරීමට තීරණය කරන බවත් අමාත්‍යවරයා පැවසීය.
රුපියල් 260ක පාලන මිලක පවතින කීරිසම්බා සහල් කිලෝවක් මේ වනවිට වෙළඳපොලේ රුපියල් 300 – 310 අතර මිලකට අලෙවි කෙරෙන බව පැවසූ අමාත්‍යවරයා මෙරට ප්‍රධාන පෙළේ සහල් ව්‍යාපාරික ආයතන කිහිපයක් මෙසේ විශාල වශයෙන් මිල ඉහළ දැමීමට කටයුතු කරන බවත් ප්‍රකාශ කළේය.
ඒ අනුව පාරිභෝගික කටයුතු අධිකාරිය විසින් මේ සම්බන්ධයෙන් පරීක්ෂණයක් සිදුකරමින් සිටින අතර එහි ප්‍රතිඵල ඉදිරි දින කිහිපය තුළ නිකුත් කරන බවත් අමාත්‍යවරයා වැඩිදුරටත් පැවසීය.
RN
