සටහන – නිපුනි ලියනගේ
කොළඹ (LNW): ජාත්‍යන්තර මූල්‍ය අරමුදලේ (IMF) වැඩසටහනේ දක්වා ඇති පරාමිතිවලට අනුකූලව ණය ප්‍රතිව්‍යුහගත කිරීම සඳහා නිශ්චිත මූල්‍ය කොන්දේසි සම්බන්ධයෙන් ශ්‍රී ලංකාව සහ නිල ණය කාරක කමිටුව (OCC) අතර ඇති කරගත් ප්‍රතිපත්තිමය එකඟතාව එක්සත් ජනපදය විසින් පිළිගෙන තිබේ.
මෙම ගිවිසුම ශ්‍රී ලංකාවේ ආර්ථික ස්ථාවරත්වය සඳහා ඵලදායී මාවතකට ගමන් කිරීමට සහාය වන බව කොළඹ එක්සත් ජනපද තානාපතිනි ජූලි චන්ග් පැවසීය.
ජාත්‍යන්තර මූල්‍ය අරමුදලේ මීළඟ වාරිකය ලබා දීම සඳහා ණය ප්‍රතිව්‍යුහගත කිරීම සහ හොඳ ආර්ථික ප්‍රතිපත්ති පිළිබඳ ගිවිසුම තීරනාත්මක බව චන්ග් එහිදී අවධාරණය කළාය.
එමඟින් ශ්‍රී ලංකාවේ ජනතාවට ප්‍රතිලාභ අත්කර දෙමින් ආර්ථික ස්ථාවරත්වය සහ රාජ්‍ය සේවා වැඩිදියුණු කිරීම සඳහා අත්‍යවශ්‍ය මූල්‍ය සහාය ලබා ගත හැක.
එක්සත් ජනපදය තිරසාර ප්‍රකෘතියක් සඳහා ශ්‍රී ලංකාව සමඟ සිටින බව තානාපතිවරිය තවදුරටත් අවධාරණය කරන ලදී.
