සටහන – රුවන් නෙළුගොල්ල
රටේ මෙතෙක් ගැසට් කර පැවති සහල් උපරිම සිල්ලර මිල ගණන්වලට වඩා කැකුළු, නාඩු සහ සම්බා යන සහල්වර්ග කිලෝවක් රුපියල් 10ක් වැඩියෙන් අලෙවි කිරීමට ඉඩලබාදීමට ජනාධිපතිවරයා සහ රජය තීරණය කර ඇති බවත් මෙයින් පාරිභෝගිකයින්ට දැවැන්ත අසාධාරණයක් සිදුව ඇති බවත් සමස්ත ලංකා සුළු හා මධ්‍ය පාරිමාණ වී මෝල් හිමියන්ගේ සංගමය පවසයි.
ජනාධිපතිවරයා සහ රජය කළ යුතුව තිබුණේ මෙය නොව නියාමනයට යටත්ව සහල් විකිණීම සම්බන්ධයෙන් වැටළීම් සිදුකිරීම බවයි එම සංගමයේ සභාපති යූ.කේ සේමසිංහ මහතා සඳහන් කළේ.
“සහල්වල තිබුණු මිලට වඩා රුපියල් 10කින් ඉහළ දමලා විකුණන විදිහට එකඟතාවයකට ඇවිල්ලා තියෙනවා. අපේ රටේ සහල් සම්බන්ධයෙන් ගැසට් කරපු මිලක් තිබුණා. ඒ මිල තමයි කැකුළු සහල් කිලෝ එකක් 210යි, නාඩු කිලෝ එකක් 220යි, සම්බා කිලෝ එකක් රුපියල් 230යි සහ කීරි සම්බා 260ක් විදිහට තමයි තිබුණේ. නමුත් අද දවසේ සිට කීරි සම්බා හැර අනෙක් සහල් වර්ග 03 සඳහා රුපියල් 10ක වැඩිවීමක් නියම වෙලා තියෙනවා. මේක නෙමෙයි කරන්න තිබුණේ. නියාමනයට යටත්ව සහල් විකිණීම සම්බන්ධයෙන් වැටලීම කිරීම තමයි සිදුකළ යුතුව තිබුණේ. නමුත් මේ තීන්දුව දැන් අරගෙන තිබෙනවා. හැබැයි අපි විශ්වාස කරනවා ජනාධිපතිවරයා සහ රජය විසින් මේ ගත්තු තීරණයට අනුව, අද දවසේ සිට පාරිභෝගික අධිකාරිය හරහා සහල් වැටලීම් සිදුකරන්න ආරම්භ කරයි කියලා. එහෙම නොකළොත් මේ රටේ පාරිභෝගික ජනතාව දැවැන්ත අසාධාරණයකට ලක්වෙනවා. රුපියල් 10ක් සහල් වැඩිකරලා දීලා මහා පාරිමාණ වී මෝල් හිමියන්ට තවත් රුපියල් 10කින් ඔවුන්ගේ ලාභය වැඩිකරලා දුන්න අවස්ථාවකත් මෙය නොවිය යුතුයි. ඒ නිසා අනිවාර්යෙන් පාරිභෝගික අධිකාරිය විසින් ලංකාව පුරා සියලුම වෙළෙඳසැල් සහ වී මෝල වලට ගිහිල්ලා ඒ වැටලීම් සිදුකරලා මේ සම්බන්ධයෙන් කටයුතු සිදුකළ යුතුයි”
සමස්ත ලංකා සුළු හා මධ්‍ය පාරිමාණ වී මෝල් හිමියන්ගේ සංගමයේ සභාපතිවරයා මේ බව පැවසුවේ ජනාධිපතිවරයා විසින් ප්‍රකාශයට පත්කර ඇති නව සහල් මිල ගණන් පිළිබඳ අදහස් දක්වමිනි.
