මෙරට ජනතාව අතර ඉතා වේගයෙන් කතාබහට ලක්ව තිබෙන අයිස් මත්ද්‍රව්‍ය භාවිත කරන පුද්ගලයන් ආඝාතය හෙවත් අංශභාගය හා හෘදයාබාධ වැනි රෝගවලට ගොදුරුවීමට හෝ ඉතා කෙටි කලකින් මරණයට පත්වීමට සිදු විය හැකි බව අනුරාධපුර ශික්ෂණ රෝහලේ ලිංගාශ්‍රිත වෛද්‍ය සේවා ඒකකයේ වෛද්‍ය නිලධාරිනී හේමා වීරකෝන් මහත්මිය අනාවරණය කරන්නීය.
‘දිනමිණ’ කළ විමසීමකදී ඇය පැවසුවේ මෙම අයිස් මත්ද්‍රව්‍ය උත්තේජක ඖෂධ කාණ්ඩයට අයත් බැවින් අධික භාවිතයට ඇබ්බැහිවීමක් සිදු වන බවයි. එමනිසා මත්ද්‍රව්‍ය භාවිතා කරන පුද්ගලයින්ට ඉතා සුළු කාලයකදී වැඩි හානියක් සිදු විය හැකි බවත් වෛද්‍ය හේමා වීරකෝන් මහත්මිය කීවාය.
මේ අතර එම මත්ද්‍රව්‍ය ඉතා සුළු ප්‍රමාණයක් භාවිතා කළ ද හානි සිදු විය හැකි බවත් වරක් භාවිතා කළ ද පැය දොළහක් වගේ කාලයක් එහි බලපෑම ඇතිවන බවත් ඇය පැවසූවාය.
අයිස් මත්ද්‍රව්‍ය භාවිතයට ගත් පසු එම පුද්ගලයා බලාපොරොත්තු වන දේට අමතරව ඇඟ කැසීම, මුඛය වියළි ගතිය, වැඩිපුර දහඩිය දැමීම, හදවත ගැසීමේ වේගවත් බව සහ හුස්ම ගැනීම වේගවත් වීම, කෑම අරුචිය වැනි දේ ඇති විය හැකියි. එමෙන්ම අයිස් මත්ද්‍රව්‍ය වැඩි ප්‍රමාණයක් භාවිතයට ගන්නා පුද්ගලයන්ට ආඝාතය හෙවත් අංශභාගය සහ හෘදයාබාධ වැලඳීම, සිහිසුන්වීමට හෝ මරණයට පත් විය හැකියි. මෙම මත්ද්‍රව්‍ය නිසා ඇතිවන මානසික සංකූලතා ඉතා සුලභයි. එවිට කරන්නේ කුමක්ද යන්න වටහා ගැනීමට නොහැකි වනු ඇතැයි ද ඇය කීවාය.
රෂිකා හෙන්නායක
