සටහන – රුවන් නෙළුගොල්ල
මෙරටට ලුණු ආනයනය කිරීම සඳහා රාජ්‍ය වාණිජ විවිධ නීතිගත සංස්ථාව විසින් ජාත්‍යන්තර ටෙන්ඩර් කැඳවා තිබේ.
ඒ අනුව අමු අයඩීකරණය නොකළ ලුණු මෙට්‍රික් ටොන් 30,000ක් ආනයනය කිරීම සඳහා ටෙන්ඩර් කැඳවීම දෙසැම්බර් 21 වනදා සිට ආරම්භ කර ඇති අතර 2025 ජනවාරි 02 වනදා දක්වා ටෙන්ඩර් ඉදිරිපත් කිරීමට කාලය ලබාදී ඇත.
කැබිනට් මණ්ඩලය අනුමැතිය ලබාදී ඇත්තේ 2025 ජනවාරි 31 වනදාට පෙර ශ්‍රී ලංකා රාජ්‍ය වාණිජ විවිධ නීතිගත සංස්ථාව මගින් එම ලුණු ආනයනය කර දේශීය ලුණු නිෂ්පාදකයින් මගින් වෙළෙඳපොළට සැපයීම සඳහා ය.
ඒ අනුව ජනවාරි 02 වනදා ටෙන්ඩර් විවෘත කිරීමෙන් අනතුරුව ආනයන කටයුතු සඳහා ඉතිරිවන්නේ ඉතා කෙටි කාලයක් පමණක් බැවින් එම කාලය තුළ ලුණු මෙට්‍රික් ටොන් 30,000ක් ආනයනය කිරීම ප්‍රායෝගිකව දුෂ්කර බව කර්මාන්තකරුවන් පෙන්වා දෙන අතර නියමිත කාලයට පෙර ලුණු ආනයනය කිරීමට නොහැකි වුවහොත් ලුණු ආශ්‍රිත ඇතැම් නිෂ්පාදන සඳහා බාධා ඇති වියහැකි බවත් ඔවුහු පෙන්වා දෙති.
