සටහන – රුවන් නෙළුගොල්ල
ඓතිහාසික රුහුණු කතරගම මහා දේවාලයේ මූල්‍ය දායකත්වයෙන් සහ අනුග්‍රහයෙන් කතරගම දිස්ත්‍රික් රෝහලට පරිත්‍යාග කෙරෙන නවීන වාට්ටු සංකීර්ණයේ ඉදිකිරීම් කටයුතු මේ වනවිට කඩිනමින් සිදුකෙරෙමින් පවතී.
දේවාලයේ බස්නායක නිළමේ තැන්පත් ඩිෂාන් ගුණසේකර මහතාගේ අදහසක් අනුව මෙම වාට්ටු සංකීර්ණය ඉදිකෙරෙන අතර ඊට වැය කෙරෙන මුදල රුපියල් මිලියන 15 කි.
මෙම නවීන වාට්ටු සංකීර්ණයේ ඇඳන් ධාරිතාවය 47ක් වන අතර කතරගම දිස්ත්‍රික් රෝහලේ දැනට ඇති සමස්ත ඇඳන් සංඛ්‍යාවම 57 කි.
ඒ අනුව මෙම වාට්ටු සංකීර්ණය ඉදිකිරීමෙන් අනතුරුව කතරගම දිස්ත්‍රික් රෝහලේ අනෙකුත් අඩුපාඩු ද පුරවමින් එම රෝහල සම්පූර්ණයෙන්ම නවීකරණය කිරීම සඳහා කතරගම දේවාලයේ බස්නායක නිළමේ තැන්පත් ඩිෂාන් ගුණසේකර මහතා මේ වනවිට සැලසුම් කරමින් සිටින අතර රුපියල් මිලියන 50ක පමණ මුදලකින් ඒ සියලු කටයුතු අවසන් කිරීමට හැකිවනු ඇතැයි බලාපොරොත්තු වේ.
මේ සියලුම මුදල් කතරම දෙවියන් කෙරෙහි බැතියෙන් යුතුව ජනතාව විසින් ඓතිහාසික රුහුණු කතරගම මහා දේවාලයට පරිත්‍යාග කරන ලද මුදල් වේ.
කතරගම දේවාලයේ බස්නායක නිළමේ තැන්පත් ඩිෂාන් ගුණසේකර මහතා අද (දෙසැම්බර් 07) උදෑසනත් මෙහි ඉදිකිරීම් කටයුතු නිරීක්ෂණය කළේය.
මීට පෙර කතරගම දේවාලයේ මූල්‍ය දායකත්වයෙන් යුතුව මහරගම අපේක්ෂා රෝහලට මහල් හතරකින් සමන්විත නවීන වාට්ටු සංකීර්ණයක් පරිත්‍යාග කෙරුණු අතර ඒ සඳහා දේවාලයෙන් වැය කෙරුණු මුදල රුපියල් මිලියන 160 කට අධික ය.
සබැඳි පුවත් –
