කොළඹ LNW: වාලච්චේනය කඩදාසි කම්හල යළි උපරිම ධාරිතාවෙන් ක්‍රියාත්මක කරවීමට රජය තීරණය කර තිබේ.
කම්හලේ කඩදාසි නිශ්පාදනය සඳහා අවශ්‍ය ප්‍රධාන අමුද්‍රව්‍යවන ඉවත ලන තත්ත්වයෙන් උසස් කඩදාසි සපයා ගැනීම සඳහා රජයේ ආයතනවල ඉවතලන කඩදාසි ශ්‍රී ලංකා කඩදාසි සමාගමේ වාලච්චේන කම්හලට භාර දීම කර්මාන්ත සහ ව්‍යවසායක සංවර්ධන අමාත්‍ය සුනිල් හදුන්නෙත්ති මහතා විසින් ඉදිරිපත්කළ කැබිනට් පත්‍රිකාවකට අනුමැතිය හිමිව ඇත.
වාලච්චේන කඩදාසි කම්හල 1955දි නිෂ්පාදනය ආරම්භ කර ඇති අතර පසුව එහි නිෂ්පාදන ක්‍රියාවලිය ඇනහිටියේය.
2020 දි යළිත් කම්හල ආරම්භ කළ නමුත් එහි යන්ත්‍ර දෙකෙන් එක් යන්ත්‍රයක් පමණයි මේ වන විට ක්‍රියාත්මක වන්නේ.
ඉන් මාසෙකට මෙට්‍රික් ටොන් 250ක් කඩදාසි නිෂ්පාදනය කළ හැකි බව සඳහන්. කඩදාසි නිශ්පාදනය සඳහා අවශ්‍ය ප්‍රධාන අමුද්‍රව්‍ය ඉවතලන කඩදාසි වන අතර ඉවතලන කඩදාසි ප්‍රමාණවත් තොග අඛණ්ඩව ලැබෙන්නේ නම් මේ කර්මාන්තය පවත්වාගෙන යා හැකි හෙයින් එම අවශ්‍යතාව සපුරා ගැනීම වෙනුවෙන් කැබිනට් මණ්ඩල පත්‍රිකාව ඉදිරිපත් කර තිබුණි.
ඒ අනුව රජයේ මුද්‍රණාලය, මුද්‍රණ නීතිගත සංස්ථාව, මැතිවරණ කොමිසම, අධ්‍යාපන අමාත්‍යාංශය සහ ඒ යටතේ ක්‍රියාත්මකවන රජයේ ආයතන, විශ්වවිද්‍යාල, රජයේ සියලු අමාත්‍යාංශ සහ දෙපාර්තමේන්තු මගින් බැහැර කරනු ලබන තත්ත්වයෙන් උසස් සුදු කඩදාසි ඇතුළු ඉවතලන කඩදාසි තොග සීමා සහිත ජාතික කඩදාසි සංස්ථාව විසින් ප්‍රවාහන පහසුකම් සැලසීමේ පදනම මත නොමිලේ සීමා සහිත කඩදාසි සමාගම වෙත ලබා දෙන්න යෝජනා කර ඇත.
අනෙක් රාජ්‍ය ව්‍යවස්ථාපිත ආයතන සහ මණ්ඩල ඇතුළු සියලුම ආයතනවල පවතින ටෙන්ඩර් පිටිපාටියෙන් බැහැරව ජාතික කඩදාසි සංස්ථාව සමග එකඟවන සහනදායි මිලකට එකී සමාගම වෙත භාරදීමට යෝජනා කර තිබේ.
ආශිකා බ්‍රාහ්මණ
