සටහන: සශිකලා මධුෂාණි
මාර්තු 04; ලෝකය(අවුට්බවුන්ඩ් ටුඩේ) : ජනාධිපති ඩොනල්ඩ් ට්‍රම්ප් විසින් කැනඩාව සහ මෙක්සිකෝව, චීනය සඳහා යෝජිත 25% තීරුබදු අද(04)සිට ක්‍රියාත්මක වන බව වාර්තා වේ.
චීන ආනයන සඳහා අතිරේක 10% තීරුබදු ද බලාත්මක වනු ඇතැයි අපේක්ෂා කරන අතර තිදෙනාම ඇමරිකාවේ ප්‍රමුඛතම වෙළඳ හවුල්කරුවන් වේ.
මේ සම්බන්ධයෙන් රටවල් තුනම එක්සත් ජනපදයට එරෙහිවද තීරුබදු ක්‍රියාත්මක කරන බවට ප්‍රකාශ කර ඇති අතර කැනේඩියානු විදේශ ඇමතිනි මෙලනි ජොලි සඳහන් කර තිබුණේ, කැනඩාවට වෙළඳ යුද්ධයක් අවශ්‍ය නොවන නමුත් එක්සත් ජනපදය එය ආරම්භ කළහොත් ප්‍රතිප්‍රහාර එල්ල කිරීමට සුදානම් බවයි.
දශක ගනනාවක් නිදහස් වෙලඳාමෙන් භුක්ති විඳි උතුරු ඇමරිකාවේ සමීප සබඳතා නොතකා ඩොනල්ඩ් ට්‍රම්ප්ගේ නව බදු ප්‍රතිපත්තිය හේතුවෙන් එක්සත් ජනපදයේ ප්‍රධාන දර්ශක තුනම පහත වැටි ඇති අතර ඩව් ජෝන්ස් කාර්මික සාමාන්‍යය දිනය අවසන් වූයේ 1.4%කින්, S & P 500 1.75% කින් සහ Nasdaq 2.6% කින් ලෙස පහත වැටීමෙනි.
සිය ධුරයේ දිවුරුම් දෙමින් ඇමරිකානු ජනාධිපතිවරයා ජනවාරි මස 20 වන දින සඳහන් කලේ එක්සත් ජනපදයට නීති විරෝධී මත්ද්‍රව්‍ය සහ නීතිවිරෝධී සංක්‍රමණිකයන් වලක්වා ගැනීමේ ක්‍රියාමාර්ගයක් වශයෙන් මෙක්සිකෝවට හා කැනඩාවට තීරුබදු පනවන බවත්, යුරෝපීය සංගමයට 25% තීරුබදු පැනවීමට බලාපොරොත්තුවන බවත්ය.
