ප්‍රකාශයක් ලබාදීම සඳහා අද (05) පෙරවරුවේ අපරාධ පරීක්ෂණ දෙපාර්තමේන්තුවට පැමිණීමෙන් පසු මේ වනවිට අත් අඩංගුවට ගෙන සිටින ඩේසි ෆොරස්ට් මහත්මියට වයෝවෘද්ධ පුද්ගලයකුට ලැබිය යුතු කිසිදු පහසුකමක් ලබානොදීම සම්බන්ධයෙන් රාජපක්ෂ පවුලේ සාමාජිකයින් පැමිණිල්ලක් ගොනුකිරීමට සූදානම් වන බව වාර්තා වේ.
වයස අවුරුදු 97ක් වන, යම් යම් අසනීප තත්වයන්ගෙන් පෙළෙන ඩේසි ෆොරස්ට් මහත්මියට අද උදෑසන 09.00 සිට ආහාර ලබාගැනීමට අවස්ථාව ලබාදී නොමැති අතර ඇයව රැක බලාගන්නා හෙදියට ද අපරාධ පරීක්ෂණ දෙපාර්තමේන්තුවට ඇතුළු වීමට අවස්ථාව ලබාදී නොමැති බවයි රාජපක්ෂ පවුලේ සාමාජිකයින් පවසන්නේ. එමෙන්ම ඇයට ඇගේ රෝද පුටුවෙන් අපරාධ පරීක්ෂණ දෙපාර්තමේන්තුවට යාමට ද ඉඩදී නොමැති බව සඳහන්.
ඒ අනුව, ඩේසි ආච්චිගේ ජීවිතයට අවදානමක් පවතින බව පවසමින් රාජපක්ෂ පවුලේ සාමාජිකයින් විසින් අපරාධ පරීක්ෂණ දෙපාර්තමේන්තුවට එරෙහිව මානව හිමිකම් කොමිසම ඇතුළු අදාළ ආයතනවලට පැමිණිලි කිරීමට නියමිත බවයි ආරංචිමාර්ග සඳහන් කළේ.
