සටහන – රුවන් නෙළුගොල්ල
අද (මාර්තු 18) උදෑසන 07.00 සිට වැඩවර්ජනයක් ආරම්භ කිරීමට සෞඛ්‍ය වෘත්තීයවේදීන්ගේ වෘත්තීය සමිති සන්ධානය තීරණය කර තිබේ.
මෙවර අයවැය යෝජනා හරහා දීමනා කප්පාදු වීම, වැටුප් විෂමතා ඉහළ යාම ඇතුළු කරුණු කිහිපයක් මුල් කරගනිමින් ඉදිරිපත් කරන ලද ඉල්ලීම්වලට බලධාරීන්ගෙන් ප්‍රතිචාරයක් නොලැබීම හේතුවෙන් මෙසේ වැඩවර්ජනයකට යාමට සිදුව ඇති බවයි එම වෘත්තීය සමිති සන්ධානයේ සම කැඳවුම්කරු රවී කුමුදේශ් මහතා සඳහන් කළේ.
“අපි තීරණය කරගත්ත විදියටම 18 වෙනිදා උදෑසන 07.00 ට වර්ජන ක්‍රියාමාර්ගය ආරම්භ කරනවා සෞඛ්‍ය වෘත්තීයවේදීන්ගේ සම්මේලනය විදියට. අපි උපරිම උත්සාහ කළා මුදල් අමාත්‍යාංශයත් එක්ක තාක්ෂණිකව මේ ප්‍රශ්නය විසඳාගන්න. නමුත් අපි දැක්කෙ මුදල් අමාත්‍යාංශය මහපු ඇඳුමක් අමාරුවෙන් අපට අන්දන්න යනවා. ඒ ඇඳුම අපට අඳින්න බැහැ. ඒ ඇඳුම ඇන්දොත් අපිට ඉතාම වැදගත් ස්ථාන නිරුවත් වෙන තත්වයක් තියෙන්නෙ”
තමන් මෙම වැඩවර්ජනය කරන්නේ වෛද්‍ය, හෙද, පරිපූරක වෛද්‍ය, අතුරු වෛද්‍ය ඇතුළු සියලුම සෞඛ්‍ය වෘත්තීයවේදීන්ගේ අනන්‍යතාවය රැකගැනීම වෙනුවෙන් බවත් ඒ මහතා සඳහන් කළේය.
රවී කුමුදේශ් මහතා මේ බව පැවසුවේ ඊයේ (මාර්තු 17) මුදල් අමාත්‍යාංශයට ගොස් එහි නිලධාරීන් සමග සාකච්ඡාවක් පැවැත්වීමෙන් අනතුරුව මාධ්‍ය වෙත අදහස් දක්වමිනි.
පරිපූරක වෛද්‍ය වෘත්තීයවේදීන්ගේ ඒකාබද්ධ බලමණ්ඩලයට අයත් වෘත්තීය සමිති 7ක් සහ අතුරු වෛද්‍ය සේවා ඒකාබද්ධ පෙරමුණට අයත් වෘත්තීය සමිති 11ක් මෙම වැඩවර්ජනය සඳහා සහාය පළකර ඇත.
