රජයට අයත් ශ්‍රී ලංකන් ගුවන් සමාගම මේ වනවිට මහාභාණ්ඩාරය මත යැපෙන තත්වයෙන් ඉවත්ව ස්වාධීනව නැගී සිටිය හැකි මට්ටමට පැමිණ ඇති බව එම ගුවන් සමාගමේ සභාපති සරත් ගනේගොඩ මහතා පවසයි.
“අපට දැන් ගුවන් යානා 23ක් තියෙනවා මේකත් එක්ක. පුළුල් බඳ යානා 10 යි, පටු බඳ යානා 13 යි. ඒකත් එක්ක දැන් ගමනාන්ත 37කට විතර ක්‍රියාත්මක වෙනවා, රටවල් 24ක මං හිතන්නෙ. අලුත් ගුවන් යානයත් එක්ක අපි හිතනවා අපට ඉතාමත් කාර්යක්ෂම සේවයක් දෙන්න පුළුවන් කියලා අපේ මගීන්ට. නිවැරදි වේලාවට පැමිණීම් අපට වැඩිදියුණු කරන්න පුළුවන් වෙයි. මේක දැකපුවාම ඔබට පේනවා හොඳින් නවීකරණය කරන ලද යානයක්. ඒකත් එක්ක අපට මගීන්ට වඩා හොඳ සේවාවක් දැන් තියෙනවාට වඩා ලබාදෙන්න පුළුවන් වෙයි”
ප්‍රශ්නය – ශ්‍රී ලංකන් ගුවන් සමාගමේ අනාගතය පිළිබඳව රටේ ජනතාවට මොන වගේ අදහසක්ද බලාපොරොත්තු වෙන්න පුළුවන් ?
“රටේ ජනතාවටත් ඉස්සෙල්ලා අපට බලාපොරොත්තුව දෙන්න ඕනෙ මේකෙ ඉන්න 6,000ක් සේවක පිරිසට. කේටරින් එකේ තව 900ක් ඉන්නවා. ඒ කියන්නෙ පවුල් 6000ක්, ඒගොල්ලොන්ගෙ දරුවන්, අපට ඔක්කොටම ඉස්සෙල්ලා ඒගොල්ලොන්ට දෙන්න ඕනෙ බලාපොරොත්තුව. අපි හිතනවා දැන් ඒගොල්ලොන්ට ලොකු බලාපොරොත්තුවක් තියෙනවා කියලා. රටේ ජනතාවට දැනගන්න පුළුවන් වෙයි මේකෙ ප්‍රතිලාභ. අපි දැන් මහාභාණ්ඩාගාරයෙන් යැපෙන්නෙ නෑ. අපට අවශ්‍ය නෑ මහාභාණ්ඩාගාරය මත යැපෙන්න. අපි දැන් 100%ක් ස්වාධීන ආයතනයක්. ඔබ දන්නවා මේ ජාත්‍යන්තර මූල්‍ය අරමුදලේ ණය පහසුකම ගැන, එතැනදී යම් සීමාවන් තියෙනවා මහාභාණ්ඩාගාරයට රාජ්‍ය ව්‍යාපාරවලට සහාය දීමේදී. අපි හිතනවා දැන් අපට අපේම දෙපයින් නැගී සිටින්න පුළුවන් කියලා. ඒ කියන්නෙ රටේ ජනතාවට බරක් වෙන්නෙ නැතිව අපි බලාපොරොත්තු වෙනවා මේක කළමනාකරණය කරගන්න”
සරත් ගනේගොඩ මහතා මේ බව පැවසුවේ ශ්‍රී ලංකන් ගුවන් සේවයට අලුතින් එක්වුණු A 330 – 200 පුළුල් බඳ ගුවන් යානය කටුනායක බණ්ඩාරනායක ජාත්‍යන්තර ගුවන් තොටුපලට පැමිණි අවස්ථාවේදී එය නිරීක්ෂණය කිරීමෙන් අනතුරුව මාධ්‍ය වෙත අදහස් දක්වමිනි.
