ශ්‍රී ලාංකීය විදෙස් ශ්‍රමිකයන් තමා රටට ගෙන එන ඩොලර් වලට අදාළව ලැබීමට නියමිත දීමනා නිසි පරිදි ලබා දෙන ලෙස රජයට බලකර සිටින බව ශ්‍රමාභිමාණී ජාතික පෙරමුණ පවසයි.
ඊයේ (27) දින පැවැත්වූ මාධ්‍ය හමුවක් අමතමින් එම එකමුතුව අවධාරණය කළේ, මේ පිළිබඳව බලධාරීන්ට ලිඛිතව දැනුම් දීමට ද කටයුතු කර ඇති බවයි.
වසරකට ගෙනෙන සෑම ඩොලර් ලක්ෂයකට ම බදු රහිත මෝටර් රථයක් ලබා දීමටත්, සෑම ඩොලර් පනස් දහසකටම ඉඩමක් හා නිවාසයක් ලබා දෙන බවටත් විදෙස් ශ්‍රමිකයන් පිළිබඳව රජයේ ප්‍රතිපත්ති වලව අදාළව විෂය භාර අමාත්‍යවරයා විසින් ප්‍රකාශ කර ඇති මුත්, එතරම් අතිවිශාල මුදලක් උපයන කිසිඳු විදෙස් ශ්‍රමිකයකු ශ්‍රී ලාංකිකයන් අතර නැති බව ලංකා මැදපෙරදිග සේවා සංගමයේ සාමාජික රංජිත් නානායක්කාර මහතා අවධාරණය කරයි.
ඒ අනුව, මෙවන් ප්‍රතිපත්ති ගෙනහැර පාමින් රජය සිදුකරන්නේ වංචාවක් බව හෙතෙම චෝදනා කරයි. විදෙස්ගත ශ්‍රමිකයන්ට දීමනා ලබා දෙන බවට රජය ප්‍රකාශ කර තිබුණ ද, ඒවා කිසිදිනක ලැබී නැති බව ද ඔහු අනාවරණය කරයි.
තමා උපයන මුදල ශ්‍රී ලංකා රජය විසින් දිගටම වංචා කරන බවත්, තමාට අයත් දීමනා ලබා දෙන බවට රජය විසින් ලිඛිතව පොරොන්දු ලබා දෙන්නේ නම් ඇතිතරම් ඩොලර් රටට ගෙන ඒමට හැකි බවත් සමස්ත ලංකා මැදපෙරදිග සේවා සංගමයේ භාණ්ඩාගාරික ඉන්දික ජයවර්ධන මහතා පැවසීය.
MIAP
