රෂිකා හෙන්නායක අගෝස්තු 18, කොළඹ LNW:
2024 වසරට සාපේක්ෂව 2025 වසරේ ගුවන්ගමන් වාරවල සියයට 16ක වර්ධනයක් පෙන්නුම් කෙරෙන බව ප්‍රවාහන, මහාමාර්ග,වරාය සහ සිවිල් ගුවන්සේවා අමාත්‍යංශය පවසයි. ඒ අනුව ජාත්‍යන්තර ගුවන්ගමන් වාරවල සියයට 17 ක පමණ වර්ධනයක් පෙන්නුම් කරනු ලබන අතර දේශීය ගුවන්ගමන් වාරවලද සියයට 10 ක වර්ධනයක් පෙන්නුම් කෙරෙන බව එම අමාත්‍යංශය වැඩිදුරටත් සඳහන් කරයි.
ජාත්‍යන්තර ගුවන් ගමන් වාරවල වර්ධනයේ වැඩිම අගය මාර්තු මාසයේ පෙන්නුම් කරනු ලබන අතර එය 2024 වසරේ මාර්තු මාසයට සාපේක්ෂව සියයට 22 කි. තවද දේශීය ගුවන් ගමන් වාර වර්ධනයේ වැඩිම අගය ජුනි මාසයේ පෙන්නුම් කරනු ලබන අතර එය 2024 වසරට සාපේක්ෂව සියයට 38 වර්ධනයකි.
ගුවන් තොටුපොල අධිකාරිය පෙන්වා දෙන්නේ, ඉදිරි සංචාරක සමය ආරම්භයත් සමග ගුවන් ගමන් වාර තවදුරටත් පුළුල් කිරීමට බලාපොරොත්තු වන බවයි.
