රෂිකා හෙන්නායක අගෝස්තු 30 කොළඹ LNW :
පසුගියදා ඉන්දුනීසියාවේ ජකර්තා නුවරදී අත්අඩංගුවට ගත් සංවිධානාත්මක අපරාධකරුවන් මෙරටට රැගෙන ඒම සඳහා තවත් විශේෂ කණ්ඩායමක් ශ්‍රී ලංකාවෙන් පිටත් කර හැරීමට තීරණය කර තිබෙන බව වාර්තා වේ.
දැනට ඉන්දුනීසියාවේ සිටින මෙරට පොලිස් කණ්ඩායමට සහය වීම සඳහා මෙම පිරිස පිටත් කර හැරීමට නියමිත බවත්, මෙම සංවිධානාත්මක අපරාධකරුවන් මෙරටට රැගෙන ඒමේ කටයුතු තරමක් සංකීර්ණ බැවින් ඊට සහය ලබා දීම අදාළ කණ්ඩායමේ ප්‍රධාන අරමුණක් වන බවත් පොලිසියේ ජ්‍යේෂ්ඨ ප්‍රකාශකයෙකු පැවසුවේ‍‍ය.
කෙසේවෙතත් ඔවුන් මෙරටට රැගෙන ඒමේ රාජ්‍ය තාන්ත්‍රික කටයුතු මේ වන විටත් ආරම්භ වී ඇති බව පොලිසියේ ජ්‍යේෂ්ඨ ප්‍රකාශකයා වැඩිදුරටත් පැවසූ අතර, මෙරට විශේෂ පොලිස් කණ්ඩායමක් සහ ඉන්දුනීසියානු පොලිස් කණ්ඩායමක් එක්ව සිදුකළ මෙහෙයුමකදී මෙලෙස අත්අඩංගුවට ගෙන තිබුණේ සංවිධානාත්මක අපරාධකරුවන් වන කෙහෙල්බද්දර පද්මේ, කමාන්ඩෝ සලින්ත, පානදුරේ නිලංග, බැකෝ සමන්, තැඹිලි ලහිරු, බැකෝ සමන්ගේ බිරිඳ සහ කුඩා දරුවෙකුයි.
නමුත්, මෙම පිරිස සමග අත්අඩංගුවට ගත් කාන්තාව සහ කුඩා දරුවා ඊයේ පස්වරුවේ දිවයිනට රැගෙන එනු ලැබූ බවද වාර්තා විය.
කෙහෙල්බද්දර පද්මේ ඇතුළු අපරාධ කල්ලි සාමාජිකයින් පිරිසක් පසුගියදා ජකර්තා නුවරදී අත්අඩංගුවට ගත් අතර එහිදී මෙම කාන්තාව සහ කුඩා දරුවාද අත්අඩංගුවට පත් වූ අතර, එම කාන්තාවට බරපතළ අපරාධ චෝදනා එල්ල වී නොමැති බැවින් ඉන්දුනීසියානු බලධාරීන් විසින් කාන්තාව මෙරටට එවා ඇති බව වාර්තා වේ.
තවද, මහජන ආරක්‍ෂක අමාත්‍ය ආනන්ද විජේපාල මහතා පැවසුවේ, පාතාල ක්‍රියාවලට සම්බන්ධ බාල වයස්කාර දරුවන්ද දැන් හඳුනාගෙන ඇතැයි මහජන ආරක්‍ෂක අමාත්‍ය ආනන්ද විජේපාල මහතා පැවසුවා.
