සර්ව පාක්ෂික ආණ්ඩුවක් පිහිටුවීම සඳහා අවකාශ සලසමින් ධුරයෙන් ඉල්ලා අස්වන ලෙස ස්වාධීන පක්ෂ එකතුව අග්‍රාමාත්‍ය රනිල් වික්‍රමසිංහ මහතාගෙන් ඉල්ලා සිටිනවා. එම පක්ෂ එකතුව නිවේදනයක් නිකුත් කරමින් මේ බව කියා සිටී.
ජනාධිපතිවරයාට එරෙහිව විරෝධතා දැක්වූ මහජනතාව මේ වනවිට පාර්ලිමේන්තුව ඉලක්ක කර ගනිමින් විරෝධතා උත්සන්න කරමින් සිටින බව පෙන්වා දෙන ස්වාධීන පක්ෂ එකතුවේ සාමාජිකයන් අවධාරණය කරන්නේ පාර්ලිමේන්තුවේ පැවැත්මට එල්ල කරන තර්ජනය ජනතා පරමාධිපත්‍යයට හා ප්‍රජාතන්ත්‍රවාදයට එල්ල කරන මරු පහරක් බවයි.
අරාජිකත්වය හා ප්‍රචණ්ඩත්වය හේතුවෙන් ශ්‍රී ලංකාව මානව ආපදාවක් කරා සීග්‍රයෙන් ගමන් කරමින් සිටින බවත්, එසේ වුවහොත් එය විදෙස් හමුදාවකට දොරටු විවෘත කිරීමක් බවත් නිවේදනයේ වැඩිදුරටත් සඳහන් වේ.
ශ්‍රී ලංකාව දකුණු ආසියාවේ ලිබියාවට බවට පත්වීමට ඉඩ නොතබා වහාම සිය ධුරයෙන් ඉල්ලා අස් වී සර්ව පාක්ෂික ආණ්ඩුවකට ඉඩකඩ සලසන ලෙස ස්වාධීන පක්ෂ එකතුව අවධාරණය කරනවා.
UN
