සති අන්තයේ නිවාඩුව සඳහා විශේෂයෙන් ප්‍රධාන දුම්රිය මාර්ගය වන බදුලු මාර්ගය සඳහා විශාල ලෙස ජනතාව පැමිණීමත් සමඟ අධික මගී ජනතාවක් හේතුවෙන් ඇතැමුන්ට එම සේවාව ලබා ගැනීමට නොහැකි වීමෙන් දුම්රිය ස්ථානවල කලබලකාරී තත්ත්වයක් ඇතිව තිබෙන බව දුම්රිය නියෝජ්‍ය සාමාන්‍යාධිකාරි (වාණිජ) වජිර එස්. පොල්වත්තගේ මහතා අද (10) මාධ්‍ය වෙත අදහස් දක්වමින් පැවසුවේය.
කෙසේවෙතත් ඉල්ලුමට සරිලන සැපයුමක් ලබාදීමට නොහැකි වී තිබීම ගැන තමන් මගී ජනතාවගෙන් සමාව ඉල්ලා සිටින අතර පවතින තත්ත්වය වටහා ගෙන කටයුතු කරන ලෙසයි ඔහු ඉල්ලා සිටින්නේ.
දුම්රිය වෙන්කළ ආසන පවතින මැදිරිවලට ඇතැම් මගීන් බලහත්කාරයෙන් ඇතුළු වීමට උත්සහ දැරීම නිසාද ඇතිවන කලබලකාරී තත්ත්වය මත ගමනාගමන කටයුතුවලටද බාධාවන් මතුව තිබෙන බවයි පොල්වත්තගේ මහතා කියා සිටියේ.
ඒ අනුව ප්‍රවේශ පත්‍ර ලබාගත් පන්තියේ මැදිරිවල පමණක් ගමන් කරන ලෙස ඔහු ඉල්ලා සිටියි.
මේ වන විට දුම්රිය ගමනාගමනය සඳහා මගී ජනතාව වැඩි වශයෙන් එකතු වීම නිසා අනපේක්ෂිත ලෙස දුම්රිය ප්‍රවේශ පත්‍ර අලෙවි වී අවසන් වීම හේතුවෙන් මේ වන විට ප්‍රවේශ පත්‍ර නිකුත් කිරීමේ ප්‍රශ්නයක් පවතින බවයි ඔහු පැවසුවේ.
විකල්ප ක්‍රියාමාර්ග ගනිමින් එම අවහිරතාවන් අවම කර ගැනීමට කටයුතු කරමින් සිටින බවද පොල්වත්තගේ මහතා කියාසිටින ලදී.
මේ අතර දුර ගමන් සේවා දුම්රිය වෙත විශාල ඉල්ලුමක් පවතින අතර විශේෂයෙන් ප්‍රධාන මාර්ගය වන බදුලු මාර්ගයේ දුම්රිය සඳහා විශාල ඉල්ලුමක් පවතින බවත් ආසන වෙන්කරවා ගැනීමේදී සෑම දිනකම පළමු විනාඩි පහ තුළම සියලුම ආසන අලෙවි වී අවසන් වන බවයි ඔහු සඳහන් කළේ.
ASK
