රෂිකා හෙන්නායක මැයි 29, කොළඹ LNW :
පුවත අසන්න මෙතැනින්..
පුවත නරඹන්න මෙතැනින්..
ශ්‍රී ලංකාවේ දේශීය සමාගමක් ලෝකයේ ප්‍රමුඛතම බලවතුන් අභිබවා, ජර්මනියේදී පැවැත්වුණු ඇසුරුම්කරණ ක්ෂේත්‍රයේ “ලෝක කුසලානය” ලෙස සැලකෙන සම්මාන උළෙලකදී රන් කුසලානයක් දිනාගත් බව ඔබ දැන සිටියාද? මෙය වාණිජ ජයග්‍රහණයක් පමණක් නොව, ශ්‍රී ලාංකේය නිෂ්පාදන හැකියාව සහ නිර්මාණශීලිත්වය ලෝකයේ ඉහළම තලයට ළඟා වී ඇති බව සනාථ කළ විස්මිත අවස්ථාවකි. Aitken Spence Printing සමාගම අත්කර ගත් මෙම ‘WorldStar 2026’ අතිවිශිෂ්ට ජයග්‍රහණය මගින් ජාත්‍යන්තරය හමුවේ ශ්‍රී ලංකාවට හිමි වූයේ සුවිශේෂී ගෞරවයකි.
. ශ්‍රී ලාංකේය මුද්‍රණ ක්ෂේත්‍රයේ නව සන්ධිස්ථානයක්
ලෝක ඇසුරුම්කරණ සංවිධානය (World Packaging Organisation – WPO) විසින් සංවිධානය කරනු ලබන මෙම සම්මාන උළෙල ලෝකයේ වඩාත්ම කීර්තිමත් ඇගයීම ලෙස සැලකේ. රටවල් 66ක් නියෝජනය කරන සාමාජිකයින් 84 දෙනෙකුගෙන් සමන්විත WPO ආයතනය විසින් පවත්වන ලද මෙම තරගාවලියේදී, “WorldStar 2026 Award for Packaging Excellence” සම්මානය දිනාගත් ශ්‍රී ලංකාවේ පළමු සහ එකම ‘Offset Printing’ සමාගම බවට පත්වීමට Aitken Spence Printing සමත් විය. මෙම ජයග්‍රහණය වඩාත් සුවිශේෂී වන්නේ ඔවුන් මෙම තරගාවලිය සඳහා ඉදිරිපත් වූ ප්‍රථම අවස්ථාවේදීම මෙම ඓතිහාසික ජයග්‍රහණය සනිටුහන් කිරීම නිසාය.
මෙම ජයග්‍රහණය “Made in Sri Lanka” යන සන්නාමය ගෝලීය වෙළෙඳපොළ තුළ ඉහළම වටිනාකමකින් යුතු ලකුණක් බවට පරිවර්තනය කිරීමට සමත්ව ඇත. මේ පිළිබඳව අදහස් දක්වමින් Aitken Spence Printing සමාගමේ අධ්‍යක්ෂ සහ ප්‍රධාන විධායක නිලධාරී දේශාන්ත සිල්වා මහතා මෙසේ පැවසීය:
“අපගේ පළමු සහභාගීත්වයේදීම, ශ්‍රී ලංකාවේ offset මුද්‍රණ සමාගමක් ලැබූ මෙවැනි ප්‍රථම ජාත්‍යන්තර ඇගයීම පිළිබඳව අප නිහතමානීව ආඩම්බර වනවා. මෙය අපගේ නව්‍ය නිෂ්පාදන මාදිලිය (adaptive manufacturing model) සහ අපගේ සේවක මණ්ඩලයේ නොසැලෙන කැපවීමේ ප්‍රතිඵලයක්. නවීන තාක්ෂණය සහ පරිසර හිතකාමී ක්‍රියාවලීන් හරහා පාරිභෝගික විශ්වාසය තහවුරු කෙරෙන විශිෂ්ටතම නිමාවකින් යුත් නිෂ්පාදන ලබාදීමට අප නිරන්තරයෙන් බැඳී සිටිනවා.”
‘Luxury Packaging’ කාණ්ඩයෙන් ලෝකයම දිනාගැනීම
ජර්මනියේ ඩසල්ඩෝෆ් (Düsseldorf) නුවර පැවැත්වුණු ලොව ප්‍රමුඛතම වෙළෙඳ ප්‍රදර්ශනයක් වන ‘Interpack’ ප්‍රදර්ශනයට සමගාමීව මෙම සම්මාන ප්‍රදානය සිදු කෙරිණි. Aitken Spence Printing සමාගම මෙහිදී ජයග්‍රහණය කළේ ‘Luxury Packaging’ හෙවත් සුඛෝපභෝගී ඇසුරුම්කරණ අංශයෙනි.
වර්තමාන ගෝලීය වෙළෙඳපොළ තුළ නිෂ්පාදන “ප්‍රීමියම්කරණය” (Premiumization) සඳහා පවතින දැඩි ඉල්ලුම හමුවේ, සුඛෝපභෝගී අංශයෙන් මෙවැනි සම්මානයක් දිනාගැනීම අතිශය වැදගත් වේ. මින් පැහැදිලි වන්නේ ශ්‍රී ලංකාව තවදුරටත් අඩු පිරිවැය සහිත නිෂ්පාදන සපයන්නෙකු පමණක් නොව, ඉහළ වටිනාකමක් සහිත (high-value) නිර්මාණශීලී නිෂ්පාදන නිපදවිය හැකි රටක් බවයි. ලෝකයේ සුපිරි ගණයේ සන්නාමයන් අපේක්ෂා කරන ඉහළම ගුණාත්මකභාවය සහ ශිල්පීය නිපුණතාවය Aitken Spence සතු බව මෙයින් තහවුරු විය.
පරිසර හිතකාමීත්වය ජයග්‍රහණයේ රහස
අද වන විට යුරෝපය ඇතුළු ජාත්‍යන්තර වෙළෙඳපොළට පිවිසීම සඳහා ඇති "ප්‍රවේශ පත්‍රය" වන්නේ තිරසාරත්වය සහ පරිසර හිතකාමීත්වයයි. Aitken Spence Printing සමාගම මෙම අංශයෙන් කලාපයේම පෙරගමන්කරු ලෙස කටයුතු කරයි.
- විශේෂ සහතිකකරණය: දකුණු ආසියාවේ ප්‍රථම ‘LEED Gold’ සහ ‘Carbon Neutral’ සහතිකය ලත් මුද්‍රණ ආයතනය ලෙස ඔවුන් ඉතිහාසගත වී ඇත.
- පාරිසරික පියවර: වහලය මත සවිකළ සූර්ය පැනල පද්ධතිය, දිවා ආලෝකය උපරිමයෙන් ප්‍රයෝජනයට ගැනීම (daylight harvesting) සහ වැසි ජලය රැස්කිරීම වැනි ව්‍යාපෘති හරහා ඔවුන් “හරිත” නිෂ්පාදන ක්‍රියාවලියක් පවත්වාගෙන යයි.
ගෝලීය සම්මාන සඳහා සලකා බලන්නේ අවසාන නිෂ්පාදනය පමණක් නොව, එය නිපදවන පසුබිම් ක්‍රියාවලියේ පාරිසරික අවම බලපෑමයි. මෙම “හරිත” ගෞරව නාමය Aitken Spence සමාගමට ජාත්‍යන්තරයේ දැවැන්ත තරගකාරී වාසියක් ලබා දී ඇත.
ගාල්ලේ සිට ලෝක කුසලානය දක්වා දශක හතක පරිණාමය
මෙම ගෝලීය ජයග්‍රහණය එක රැයකින් ලද දෙයක් නොව, දශක හතක් පුරා විහිදුණු දැවැන්ත කැපවීමක ප්‍රතිඵලයකි. වසර 70කට පෙර ගාල්ලේ කුඩා මුද්‍රණ අංශයකින් ඇරඹි මෙම ව්‍යාපාරය, අද වන විට මාවරමණ්ඩිය ප්‍රදේශයේ වර්ග අඩි 100,000ක දැවැන්ත නවීන තාක්ෂණික කර්මාන්තශාලාවක් දක්වා පරිණාමය වී ඇත. අද ඔවුන් FMCG, තේ, ඇඟලුම් සහ ඖෂධ වැනි විවිධ ක්ෂේත්‍ර රැසක දැවැන්තයින්ගේ විශ්වාසනීය ඇසුරුම්කරණ සහකරුවා වේ.
Aitken Spence PLC හි සභාපතිනී ස්ටාෂානි ජයවර්ධන මහත්මිය මෙම සුවිශේෂී ජයග්‍රහණය පිළිබඳව දැක්වූ අදහස මෙසේය:
"මෙම ඇගයීම Aitken Spence Printing සමාගමට පමණක් නොව, සමස්ත ශ්‍රී ලංකාවේ නිෂ්පාදන සහ අපනයන ක්ෂේත්‍රයටම ලැබුණු විශාල ගෞරවයක්. නව්‍යකරණය, ගුණාත්මකභාවය සහ තිරසාරත්වය ඔස්සේ ශ්‍රී ලාංකේය ව්‍යාපාරවලට ගෝලීය මට්ටමින් ජයග්‍රහණය කළ හැකි බව මෙයින් තහවුරු වනවා. ක්ෂේත්‍රයේ ප්‍රමිතීන් ඉහළ නැංවීමටත්, ජාත්‍යන්තරව පිළිගත් නිෂ්පාදන සහ සේවාවන් සැපයීමට Aitken Spence සමූහය දක්වන කැපවීම මෙයින් නැවතත් තහවුරු කර තිබෙනවා."
Aitken Spence Printing සමාගම අත්කරගත් මෙම 'WorldStar' ජයග්‍රහණය ශ්‍රී ලාංකේය කර්මාන්ත ක්ෂේත්‍රයට නව බලාපොරොත්තුවක් සහ මගපෙන්වීමක් සපයයි. නිවැරදි දැක්මක්, ජාත්‍යන්තර ප්‍රමිතීන් සහ පරිසර හිතකාමී නව්‍යකරණයන් පවතී නම්, ශ්‍රී ලංකාව වැනි කුඩා රටක ව්‍යාපාරයකට පවා ලෝකයේ "එවරස්ට්" මුදුනටම ළඟා විය හැකි බව මින් ඔප්පු වේ.
