සටහන: සශිකලා මධුෂාණි
ජූලි මස 17: ලෝකය(අවුට්බවුන්ඩ් ටුඩේ): එක්සත් ජනපදයේ ට්‍රම්ප් පරිපාලනය විසින් විදේශීය සිසුන් හා විදේශීය මාධ්‍යවේදීන් සඳහා වීසා නීති දැඩි කරන නව රෙගුලාසි ප්‍රකාශයට පත් කර තිබේ.
නව නීති අනුව, F (ශිෂ්‍ය) සහ J (හුවමාරු වැඩසටහන්) වීසා හිමියන්ට පෙර පැවති “අධ්‍යයන කාලය පුරා රැඳී සිටීම” (duration of status) වෙනුවට උපරිම වසර 4ක ස්ථාවර රැඳී සිටීමේ කාලයක් නියම කර ඇත. එම කාලය ඉක්මවා අධ්‍යයනය හෝ වැඩසටහන දිගු කරන්නේ නම්, වීසා දීර්ඝ කිරීම සඳහා වෙනම අයදුම් කිරීම අවශ්‍ය වේ.
ඒ අනුව, උපාධිය අවසන් කිරීමෙන් පසු රට හැර යාම සඳහා ලබාදෙන සහන කාලය දින 60 සිට දින 30 දක්වා අඩු කර ඇති අතර විශ්වවිද්‍යාලය හෝ අධ්‍යයන වැඩසටහන වෙනස් කිරීමට ද දැඩි අනුමැතියක් අවශ්‍ය වනු ඇත. වීසා යටතේ පැමිණෙන විදේශීය මාධ්‍යවේදීන්ගේ වීසා කාලය දින 240කට සීමා කර ඇති අතර, චීන මාධ්‍යවේදීන් සඳහා එය දින 90ක් ලෙස නියම කර ඇත.
අමෙරිකානු දේශීය ආරක්ෂක දෙපාර්තමේන්තුව (DHS) පවසන්නේ මෙම වෙනස්කම් වීසා පද්ධතියේ අධීක්ෂණය ශක්තිමත් කිරීම සහ වීසා අනිසි ලෙස භාවිත කිරීම වැළැක්වීම අරමුණු කරගෙන සිදුකර ඇති බවයි. කෙසේ වෙතත්, විශ්වවිද්‍යාල සහ උසස් අධ්‍යාපන ආයතන මෙම නීති නිසා ජාත්‍යන්තර සිසුන් අමෙරිකාව තෝරා ගැනීම අඩුවිය හැකි බවට සහ විශ්වවිද්‍යාලවලට මූල්‍යමය හා අධ්‍යාපනික බලපෑම් ඇතිවිය හැකි බවට අනතුරු අඟවා ඇත.
