රෂිකා හෙන්නායක සැප්තැම්බර් 22, කොළඹ LNW :
තේරී පත් වූ පරිපාලනයක් පිහිටුවන තෙක් ශ්රී ලංකා ක්රිකට් ආයතනයේ යහපාලනය තහවුරු කිරීම, ක්රීඩා පිටිය තුළ විශිෂ්ටත්වය ඉහළ නැංවීම සහ ආයතනයේ දෛනික කටයුතු කාර්යක්ෂමව කළමනාකරණය කිරීම තම මූලික වගකීම් බව ශ්රී ලංකා ක්රිකට් පරිවර්තන කමිටුව පවසයි.
තමන් පත් කළ දා සිට මේ දක්වා අත්කරගෙන ඇති ප්රගතිය පිළිබඳව කරුණු දක්වමින් නිකුත් කළ විශේෂ ප්රකාශයකදී එම කමිටුව මෙම ප්රමුඛතා අවධාරණය කළේය.
මාස දෙකක් වැනි කෙටි කාලයක් තුළදී නව ව්යවස්ථාවක් කෙටුම්පත් කර එය රජය වෙත ඉදිරිපත් කිරීමට පරිවර්තන කමිටුව කටයුතු කර ඇති බව එම ප්රකාශයේ සඳහන් වේ.
වඩාත් තරගකාරී තරගාවලි ක්රමයක් හරහා ක්රීඩා ප්රමිතීන් ඉහළ නැංවීමේ සහ ජාතික කණ්ඩායම සඳහා දක්ෂතා හඳුනාගෙන ඒවා සංවර්ධනය කිරීමේ ක්රියාවලිය තවදුරටත් ශක්තිමත් කිරීමේ අරමුණින්, දේශීය ක්රිකට් ව්යුහය ශක්තිමත් කිරීමට පියවර ගෙන ඇති බවද කමිටුව ප්රකාශ කළේය.
රට පුරා ක්රිකට් තණතීරු (pitches) වල ප්රමිතිය ඉහළ නැංවීමේ අරමුණින්, ජාත්යන්තර ක්රිකට් කවුන්සිලයේ (ICC) හිටපු ස්වාධීන තණතීරු උපදේශක සහ ප්රධාන තණතීරු උපදේශක ඇන්ඩි ඇට්කින්සන් (Andy Atkinson) ශ්රී ලංකාවේ ජාතික තණතීරු භාරකරු (National Curator) ලෙස පත් කර ඇති බවද එම ප්රකාශය මගින් අනාවරණය කෙරිණි.
විධිමත් සම්මුඛ පරීක්ෂණ සහ තේරීම් ක්රියාවලියකින් අනතුරුව නව දිස්ත්රික් සහ පළාත් පුහුණු ව්යුහයක් ස්ථාපිත කර ඇති බවද පරිවර්තන කමිටුව පැවසීය.
එම ප්රකාශයට අනුව, විනිසුරුකරණය සහ තරග පාලන කටයුතු වල ප්රමිතිය ඉහළ නැංවීම, ක්රීඩා වෛද්ය විද්යාව සහ ක්රීඩක සුභසාධන වැඩසටහන් වැඩිදියුණු කිරීම මෙන්ම ශ්රී ලංකාවේ කාන්තා ක්රිකට්ක්රීඩාවේ තත්ත්වය සහ සංවර්ධනය ඉහළ නැංවීම සඳහා ද විවිධ පියවර ක්රියාත්මක කර ඇත.
