රෂිකා හෙන්නායක ඔක්තෝබර් 08, කොළඹ LNW :
මූලික විරෝධතා අධිකරණය විසින් ප්‍රතික්ෂේප කරයි: රුපියල් මිලියන 8.85ක වන්දි ඉල්ලා ශෂීන්ද්‍ර රාජපක්ෂට එරෙහිව පවරා ඇති නඩුවේ විභාගය ආරම්භ වේ.
හිටපු රාජ්‍ය අමාත්‍ය ශෂීන්ද්‍ර රාජපක්ෂ ඇතුළු විත්තිකරුවන් තිදෙනෙකුට එරෙහිව දූෂණ චෝදනා මත ගොනු කර ඇති නඩුව විභාගයට ගැනීමට කොළඹ මහාධිකරණය අද දිනය නියම කළේය.
විත්තිකරුවන්ට එරෙහිව ගොනු කර තිබූ අධිචෝදනා සම්බන්ධයෙන් විත්තිය මතු කළ මූලික විරෝධතා අධිකරණය විසින් ප්‍රතික්ෂේප කිරීමෙන් අනතුරුව මෙම නඩුව විභාගයට ගැනීමට නියම කෙරිණි.
අල්ලස් හෝ දූෂණ චෝදනා විමර්ශනය කිරීමේ කොමිෂන් සභාව විසින් විත්තිකරුවන්ට එරෙහිව ගොනු කර ඇති චෝදනා මත නඩුව ඉදිරියට පවත්වාගෙන යාමට ද විනිසුරුවරයා නියෝග කළේය.
විත්තිකරුවන් තමන්ට එරෙහි චෝදනා සම්බන්ධයෙන් නිවැරදිකරු බව ප්‍රකාශ කිරීමෙන් අනතුරුව, මෙම නඩුව කොළඹ මහාධිකරණ විනිසුරු රවීන්ද්‍ර ප්‍රේමරත්න මහතා හමුවේ කැඳවන ලදී.
නඩු විභාගය ආරම්භ කිරීමට පෙර, අපරාධ නඩු විධාන සංග්‍රහයේ 199 වන වගන්තිය යටතේ නඩුවේ කරුණු අධිකරණය හමුවේ ඉදිරිපත් කිරීමට පැමිණිල්ල මෙහෙයවන නීතිඥවරුන්ට අවසර ලබා දෙන ලෙස අල්ලස් කොමිසම වෙනුවෙන් පෙනී සිටි නියෝජ්‍ය අධ්‍යක්ෂ ජනරාල් සුභාෂිනී සිරිවර්ධන මහත්මිය එහිදී අධිකරණයෙන් ඉල්ලා සිටියාය.
සෙවනගල පිහිටි ශ්‍රී ලංකා මහවැලි අධිකාරියට අයත් ඉඩමක තිබූ අනවසර ඉදිකිරීමක් සම්බන්ධයෙන්, වන්දි ගෙවීමේ කාර්යාලයේ නිලධාරීන්ට බලපෑම් කිරීම මගින් රුපියල් මිලියන 8.85ක වන්දි මුදලක් අයුතු ලෙස ලබා ගැනීම මෙම විත්තිකරුවන්ට එරෙහි චෝදනාවට අදාළ වේ.
ඒ අනුව, 2023 අංක 9 දරන දූෂණ විරෝධී පනත යටතේ වරදක් සිදු කිරීම සම්බන්ධයෙන් චෝදනා කරමින් අල්ලස් කොමිසම විසින් පසුගිය ජූනි 19 වන දින මහාධිකරණය හමුවේ මෙම විත්තිකරුවන්ට එරෙහිව අධිචෝදනා ගොනු කරන ලදී.
මෙම නඩුවේ විත්තිකරුවන්ට එරෙහිව අධිචෝදනා 10ක් ගොනු කර ඇති අතර, සාක්ෂිකරුවන් 30 දෙනෙකු සහ ලේඛන 38ක් ඊට අදාළව නම් කර ඇත.
හිටපු රාජ්‍ය අමාත්‍ය ශෂීන්ද්‍ර රාජපක්ෂ, වන්දි ගෙවීමේ කාර්යාලයේ හිටපු අධ්‍යක්ෂිකා සේපාලිකා සමන් කුමාරි සහ මහවැලි අධිකාරියේ හිටපු අධ්‍යක්ෂ ජනරාල් කීර්ති බණ්ඩාර කොටගම යන අය මෙම නඩුවේ විත්තිකරුවන් ලෙස නම් කරනු ලැබ සිටිති.
