සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) ඔක්තෝම්බර් මස 12 : පුද්ගලයන් 300කට අධික පිරිසක් රැගත් සංක්‍රමණික යාත්‍රාවක් ජිබුටි වෙරළට ඔබ්බෙන් පෙරළී යාමෙන් අවම වශයෙන් පුද්ගලයන් 109 දෙනෙකු මියගොස් තවත් 116කට වැඩි පිරිසක් අතුරුදන්ව ඇති බව වාර්තා වේ.
එක්සත් ජාතීන්ගේ ජාත්‍යන්තර සංක්‍රමණ සංවිධානය (IOM) සඳහන් කර ඇත්තේ මෙම අනතුරෙන් මියගිය පිරිස අතර ළමුන් 15 දෙනෙකු ද සිටින බවයි.
දිවි ගලවාගත් පුද්ගලයන්ගේ ප්‍රකාශ අනුව, ඔක්තෝබර් 8 සහ 9 යන දිනවලට අදාළ රාත්‍රියේදී ජිබුටියේ ඔබොක් (Obock) නගරයට උතුරින් පිහිටි ගුහෙරේ (Guhere) ප්‍රදේශය ආසන්නයේදී මෙම යාත්‍රාව පෙරළී තිබේ.
ජිබුටියේ සිට යේමනය බලා ගමන් කරමින් තිබූ මෙම යාත්‍රාවේ පුද්ගලයන් 305ක් පමණ සිට ඇති බව IOM සංවිධානය සඳහන් කරයි. අනතුරෙන් දිවි ගලවාගත් පුද්ගලයන් 80කට වැඩි පිරිසක් සිටින අතර, ඔවුන් සියලුදෙනාම ඉතියෝපියානු ජාතිකයන් බව ද වාර්තා වේ.
මියගිය පුද්ගලයන් අතර පිරිමි 52ක්, කාන්තාවන් 42ක් සහ ළමුන් 15ක් සිටින බව මූලික වාර්තා පෙන්වා දෙයි.
අතුරුදන් වූවන් සොයා ජිබුටි බලධාරීන් විසින් සෝදිසි හා මුදාගැනීමේ මෙහෙයුම් අඛණ්ඩව ක්‍රියාත්මක කරනු ලබයි. දිවි ගලවාගත් පිරිසට හදිසි ආධාර සහ වෛද්‍ය සහාය ලබාදීම සඳහා ද ජාත්‍යන්තර සංක්‍රමණ සංවිධානය කටයුතු කරමින් සිටී.
අප්‍රිකාවේ හෝන් ප්‍රදේශයේ සිට ගල්ෆ් කලාපයේ රටවල් වෙත රැකියා, ආරක්ෂාව සහ යහපත් ජීවන තත්ත්වයන් සොයා යන සංක්‍රමණිකයන් විශාල පිරිසක් ජිබුටිය හරහා යේමනයට ගමන් කරති.
ජිබුටිය සහ යේමනය අතර පිහිටි බාබ් අල්-මන්දෙබ් සමුද්‍ර සන්ධිය හරහා සිදුවන මෙම ගමන් මාර්ගය අධික අවදානම් සහිත එකක් ලෙස සැලකේ. අධික පිරිසක් රැගත් යාත්‍රා භාවිතය, මුහුදේ පවතින අනතුරුදායක තත්ත්වයන් සහ කලාපයේ ගැටුම් හේතුවෙන් සංක්‍රමණිකයන්ගේ ජීවිත දැඩි අවදානමකට ලක්ව තිබේ.
