රෂිකා හෙන්නායක ඔක්තෝබර් 24, කොළඹ LNW :
ශ්‍රී ලංකා නාවික හමුදාව සහ වෙරළාරක්‍ෂක දෙපාර්තමේන්තුව ඒකාබද්ධව මාතර තලල්ල නාඔටුන්න වෙරළ තීරයේදී සිදු කළ විශේෂ සෝදිසි මෙහෙයුමකදී විශාල මත්ද්‍රව්‍ය තොගයක් අත්අඩංගුවට ගෙන ඇත.
මෙම වැටලීමේදී සැකකටයුතු උර සහ ගමන් මළු තුළ සඟවා තිබූ හෙරොයින් සහ අයිස් මත්ද්‍රව්‍ය කිලෝග්‍රෑම් 475කට ආසන්න ප්‍රමාණයක් සොයා ගැනීමට ආරක්ෂක අංශ සමත්වී තිබේ.
පොලිස් මත්ද්‍රව්‍ය නාශක කාර්යාංශයේ සහය ඇතිව සිදුකළ වැඩිදුර පරීක්ෂණවලදී, මෙම තොගය තුළ හෙරොයින් කිලෝග්‍රෑම් 275කට අධික ප්‍රමාණයක් සහ අයිස් මත්ද්‍රව්‍ය කිලෝග්‍රෑම් 200කට අධික ප්‍රමාණයක් අඩංගු බව නිල වශයෙන් තහවුරු කර ඇත.
මත්ද්‍රව්‍ය ප්‍රවාහනය සඳහා භාවිතා කරන ලද බවට සැකකෙරෙන ඩිංගි යාත්‍රාව සමඟින් මෙම නීතිවිරෝධී භාණ්ඩ තොගය ඉදිරි නීතිමය කටයුතු සඳහා අදාළ අංශ වෙත භාර දී තිබේ.
