රෂිකා හෙන්නායක ඔක්තෝබර් 25, කොළඹ LNW :
අම්පාර, සම්මන්තුරේ ප්‍රදේශයේදී හදිසියේ රෝගාතුර වූ වන අලියෙකුට ප්‍රතිකාර කිරීම සඳහා වනජීවී නිලධාරීන්, පශු වෛද්‍යවරුන්, ශ්‍රී ලංකා යුද්ධ හමුදාව සහ පොලිසිය එක්ව ඒකාබද්ධ මෙහෙයුමක් දියත් කර තිබේ.
මෙම අලියා වයස අවුරුදු 25ත් 30ත් අතර පසුවන බවට ගණන් බලා ඇති අතර, එය පිරිමි සතෙකි.
සතාගේ ශරීරයේ බාහිර තුවාල කිසිවක් දක්නට නොලැබුණද, උදර ප්‍රදේශය අසාමාන්‍ය ලෙස ඉදිමී පවතී.
විෂ සහිත යමක් හෝ දිරාපත් නොවන පොලිතින් වැනි ද්‍රව්‍යයක් ආහාරයට ගැනීම හේතුවෙන් ආමාශයේ යම් අවහිරතාවක් ඇති වී තිබිය හැකි බව බලධාරීන් සැක පළ කරයි.
නැගෙනහිර කලාපීය වනජීවී පශු වෛද්‍ය ඒකකය, අම්පාර වනජීවී පරාස කාර්යාලය සහ සම්මන්තුරේ වනජීවී උප කාර්යාලය එක්ව මෙම ප්‍රතිකාර කටයුතු සම්බන්ධීකරණය කරනු ලබයි.
ඔක්තෝබර් 22 වන දින මෙම අලියාට අවශ්‍ය ප්‍රතිජීවක ඖෂධ ලබා දෙන ලදී.
කෙසේ වෙතත්, පවතින අධික වර්ෂාව හේතුවෙන් අවට ප්‍රදේශය ජලයෙන් යට වී ඇති අතර, එමගින් ප්‍රතිකාර කණ්ඩායමට යම් යම් බාධා එල්ල වී තිබේ. ප්‍රතිකාර කටයුතු බාධාවකින් තොරව පවත්වාගෙන යාම සඳහා, එම භූමියේ වැලි අතුරමින් බිම සකස් කිරීමේ කටයුතු මේ වන විට සිදු කෙරෙමින් පවතී.
වනජීවී සංරක්ෂණ දෙපාර්තමේන්තුවට සහාය වීම සඳහා යුද්ධ හමුදා සාමාජිකයින් දස දෙනෙකු යොදවා ඇති අතර, පොලිසිය ද මේ සඳහා පූර්ණ සහාය ලබා දෙයි.
අලියාගේ ආරක්ෂාව තහවුරු කිරීමටත්, නියමිත කාල පරතරයන්ට අනුව ඖෂධ ලබා දීමටත් වනජීවී නිලධාරීන් එම ස්ථානයේ රැඳී සිටිමින් සතාගේ තත්ත්වය පිළිබඳව දැඩි අවධානයෙන් පසුවෙයි.
