රෂිකා හෙන්නායක නොවැම්බර් 01, කොළඹ LNW:
නොවැම්බර් මාසය සඳහා ගෘහස්ථ ගෑස් මිල ගණන් වෙනස් නොවනු ඇති බව ‘ලිට්‍රෝ ගෑස් ලංකා සමාගම’ (Litro Gas Lanka Ltd.) නිවේදනය කර තිබේ.
ජාත්‍යන්තර වෙළඳපොලේ ගෑස් මිල ඉහළ යාම සහ විදේශ විනිමය අනුපාත සම්බන්ධයෙන් පවතින අභියෝගාත්මක තත්ත්වයන් මධ්‍යයේ වුවද, ගෑස් මිල ඉහළ නොදමන බව එම සමාගම පවසයි.
ඒ අනුව, කිලෝග්‍රෑම් 12.5ක ලිට්‍රෝ ගෘහස්ථ ගෑස් සිලින්ඩරයක් දැනට පවතින මිල වන රු. 4,365කට අලෙවි කෙරෙනු ඇත.
එමෙන්ම, කිලෝග්‍රෑම් 5ක සිලින්ඩරයක මිල රු. 1,750ක් ලෙසත්, කිලෝග්‍රෑම් 2.3ක සිලින්ඩරයක මිල රු. 815ක් ලෙසත් නොවෙනස්ව පවතිනු ඇත.
මේ අතර, වෙළඳ, වාණිජ, ආහාර සුරක්ෂිතතා සහ සමුපකාර සංවර්ධන නියෝජ්‍ය අමාත්‍ය ආර්. එම්. ජයවර්ධන මහතා පවසන්නේ, වෙළඳපොලේ පවතින ගෘහස්ථ ගෑස් හිඟයට විසඳුමක් ලෙස ‘ලාෆ්ස් ගෑස්’ (Laughs Gas) පාරිභෝගිකයින්ට ‘ලිට්‍රෝ ගෑස්’ ලබා දීම සඳහා සාකච්ඡා සිදුවෙමින් පවතින බවයි.
‘ලාෆ්ස් ගෑස්’ සමාගම මේ වන විට වෙළඳපොළට ගෑස් සැපයීම සම්පූර්ණයෙන්ම අත්හිටුවා ඇති බව ඔහු පෙන්වා දුන්නේය.
මෙම තත්ත්වය හේතුවෙන්, රටේ සමස්ත ගෑස් සැපයුම තුළ ‘ලිට්‍රෝ ගෑස්’ සතු කොටස 80% සිට 83% දක්වා ඉහළ ගොස් තිබේ.
පාරිභෝගිකයින්ට සිදුවූ අපහසුතා සම්බන්ධයෙන් ‘ලාෆ්ස් ගෑස්’ සමාගමට එරෙහිව නීතිමය පියවර ගෙන ඇති බව ද නියෝජ්‍ය අමාත්‍යවරයා සඳහන් කළේය.
