රෂිකා හෙන්නායක නොවැම්බර් 01, කොළඹ LNW:
පවතින වැසි සහිත කාලගුණ තත්ත්වය හේතුවෙන් පළාත් හතක ඩෙංගු රෝගීන් සංඛ්‍යාව ඉහළ ගොස් ඇති බව ජාතික ඩෙංගු මර්දන ඒකකය පවසයි.
බස්නාහිර, දකුණ, සබරගමුව, ඌව, උතුර, නැගෙනහිර සහ මධ්‍යම යන පළාත්වල ඩෙංගු රෝගීන් සංඛ්‍යාව ඉහළ ගොස් ඇති බව ජාතික ඩෙංගු මර්දන ඒකකයේ අධ්‍යක්ෂ වෛද්‍ය කපිල කන්නන්ගර මහතා ප්‍රකාශ කළේය.
එමෙන්ම, ප්‍රාදේශීය ලේකම් කොට්ඨාස 130ක් පමණ තුළ මදුරු කීටයන්ගේ ඝනත්වය ඉහළ ගොස් ඇති බව ද ඔහු සඳහන් කළේය.
මේ හේතුවෙන්, නොවැම්බර් මස 9 වැනිදා සිට 14 වැනිදා දක්වා දිස්ත්‍රික්ක 13ක විශේෂ මදුරු මර්දන වැඩසටහන් ක්‍රියාත්මක කිරීමට නියමිතය.
මෙම වසරේ මේ දක්වා කාලය තුළ දිවයින පුරා ඩෙංගු රෝගීන් 105,500ක් පමණ වාර්තා වී ඇති අතර, මරණ සංඛ්‍යාව 79ක් ලෙස සටහන් වේ.
රෝගය තවදුරටත් පැතිරීම වැළැක්වීම සඳහා මදුරුවන් බෝ විය හැකි ස්ථාන විනාශ කරන ලෙස ජාතික ඩෙංගු මර්දන ඒකකය මහජනතාවගෙන් ඉල්ලා සිටී.
