රෂිකා හෙන්නායක නොවැම්බර් 03, කොළඹ LNW:
රුපියල් මිලියන 59කට අධික, මූලාශ්‍රය අනාවරණය නොවූ බැංකු තැන්පතු සම්බන්ධයෙන් ගොනු කර ඇති මුදල් විශුද්ධිකරණ නඩුවකට අදාළ සංශෝධිත අධිචෝදනා පත්‍රය, හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ මහතා වෙත අද (03) දිනයේදී කියවා දෙන ලදී.
මෙම නඩුව කොළඹ මහාධිකරණ විනිසුරු රෂ්මි සිංගප්පුලි මහතා හමුවේ කැඳවන ලදී. යොෂිත රාජපක්ෂ මහතා වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් මහතා අධිකරණයට දැනුම් දුන්නේ, තම සේවාදායකයා තමාට එරෙහි චෝදනා සම්බන්ධයෙන් වරද පිළි නොගන්නා බවයි.
ඒ අනුව, නඩු විභාගයට පෙර පැවැත්වෙන සාකච්ඡාව (pre-trial conference) දෙසැම්බර් මස 02 වන දින පවත්වන ලෙස මහාධිකරණය නියෝග කළේය.
මේ අතර, යොෂිත රාජපක්ෂ මහතාගේ ආච්චි වන ඩේසි ෆොරස්ට් මහත්මියව මෙම නඩුවෙන් නිදහස් කිරීමට ද අධිකරණය නියෝග කළේය.
වෙනත් නඩුවකට අදාළව කොළඹ අධිකරණ වෛද්‍ය නිලධාරිවරයාගේ ප්‍රධානත්වයෙන් යුත් විශේෂඥ වෛද්‍ය මණ්ඩලයක් මීට පෙර ලබා දුන් නිර්දේශයකට අනුව මෙම තීරණය ගෙන ඇත.
එම නිර්දේශයේ සඳහන් වූයේ, ඇයගේ මානසික තත්ත්වය අධිකරණ කටයුතු සඳහා සහභාගී වීමට සුදුසු මට්ටමක නොමැති බවයි.
2009 මාර්තු 31 වන දිනත් 2013 දෙසැම්බර් 12 වන දිනත් අතර කාලය තුළ, මූලාශ්‍රය තහවුරු කළ නොහැකි රුපියල් මිලියන 59කට අධික මුදලක් පෞද්ගලික බැංකු තුනක ස්ථාවර තැන්පතු ගිණුම්වල තැන්පත් කිරීම මගින් ‘මුදල් විශුද්ධිකරණය වැළැක්වීමේ පනත’ යටතේ වරදක් සිදු කළ බවට චෝදනා කරමින් මෙම නඩුව ගොනු කර ඇත.
