1988 – 89 කාලයේ මෙන් වර්තමානයේ ද ජනතා විමුක්ති පෙරමුණ රට තුළ විනාශකාරී තත්ත්වයක් නිර්මාණය කිරීමේ වෑයමක නිරත වෙමින් සිටින බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී අමල් ශාන්ත මායාදුන්න පවසයි.
ඔහු මේ බව පැවසුවේ ඊයේ (13) දින ශ්‍රී ලංකා පොදුජන පෙරමුණ විසින් කැඳවා තිබූ මාධ්‍ය හමුවක් අමතමිනි.
“1988, 1989 කාල පරිච්ඡේදය මෙන් නැවත තුන්ඩු කෑල්ලෙන් කඩසාප්පු වසන තත්ත්වයක් ගොඩනගමින් සිටින බවක් අපි දැක්කා. විශ්වවිද්‍යාල උප කුලපතිවරයෙකුට පහරදෙනවා. මෙය අපි ඉතා පිළිකුළෙන් හෙළා දකිනවා. දකුණේ විශ්වවිද්‍යාලය තුළට ජ.වි.පෙ., පෙරටුගාමි කිඳා බැහැලා දරුවන්ගේ අනාගතය විනාශ කිරීමට කටයුතු කරනවා. මේ අය අද සිදුවන දේවලට සම්පූර්ණ වගකීම භාරගත යුතුයි. ජ.වි.පෙ. ලාල්කාන්ත සහෝදරයා කියනවා බැසිල් රාජපක්ෂ මහතා සිදුකරපු සමීක්ෂණයකට අනුව අපි ඡන්දයකට යන්න බයයි කියලා. අපි ඡන්දවලට බිය පක්ෂයක් නොවේ. මේ අවස්ථාවේ රටට අවශ්‍ය ඡන්දයකට වඩා ආර්ථිකය ගොඩනැගීමයි. මේ රට සංවර්ධනය කරපු එකම දේශපාලන පක්ෂය අපියි. ඡන්ද කාලයට ඡන්දය කරමු. ප්‍රථමයෙන් රටක් ලෙස ස්ථාවරත්වය තිබිය යුතුයි. කළුතරින් ශ්‍රී ලංකා පොදුජන පෙරමුණ ආරම්භ කළ රැස්වීම් පුත්තලමෙන් අවසන් වුණා කියලා ජ.වි.පෙ. කිව්වට අපි අවසන් කළේ නෑ. මේ වන විට අපි බිම් මට්ටමේ දේශපාලන ක්‍රියාවලිය කරගෙන යනවා.”
රෂිකා හෙන්නායක
